रत्नागिरी : येथील अन्न व औषध प्रशासनाने शासनाने बंदी घातलेल्या गुटखा, तंबाखु आदी पदार्थांवर छुप्या पद्धतीने विक्री करणाऱ्यांविरोधात धाडसत्र सुरू केले. पथकाने शहरातील मजगाव रोड येथील एका जनरल स्टोअर्सवर धाड टाकली. यामध्ये बंदी असलेला पानमसाला आणि सुगंधी तंबाखु असा ६ हजार ३८८ रुपयांचा साठा जप्त करून दुकान सील करण्यात आले. याबाबत शहर पोलिस ठाण्यात तक्रार सायंकाळी उशीरापर्यंत देण्यात आली.

गुटखा, पानमसाल्यावर बंदी असतानाही राजरोस त्याचा विक्री होत असल्याची माहिती अन्न व औषध प्रशासनाला मिळाली होती. त्यावरून या विभागाने शहर आणि परिसरामध्ये धाडसत्र सुरू केले. सहायक आयुक्त संजय नारगुडे यांच्या नेतृत्वाखाली अन्न सुरक्षा अधिकारी प्रशांत गुंजाळ, दशरथ बावळे यांच्या पथकाने शहरातील मजगाव येथील सुनील लक्ष्मण रसाळ यांच्या साई किराणा अॅण्ड जनरल स्टोअर्स या दुकानावर धाड टाकली. यामध्ये विमल, आरओमडी, तैमुर पानमसाला व सुगंधी तंबाखुचा सुमारे ६ हजार ३८८ रुपयाचा साठा जप्त करण्यात आला.

तसेच पथकाने दुकान सील केले असून त्यांच्याविरोधात शहर पोलिस ठाण्यात तक्रार देण्याची कार्यवाही सुरू होती. अन्न व औषध प्रशासन आयुक्त परिमल सिंग यांच्या आदेशावरून यापुढेही बंदी असलेल्या पदार्थाची विक्री केल्यास कारवाई करण्यात येईल. याबाबतची काही माहिती असल्यास ८०५५४३६१८८ या नंबर माहिती द्यावी, असे आवाहन या विभागाने केले आहे.