खेड  (रत्नागिरी) : लोटे औद्योगिक वसाहतीतील एका रासायनिक कारखान्यातून हायड्रोक्लोरिक अँसिड घेऊन इचलकरंजी येथे जाण्यासाठी निघालेला टँकर क्रमांक एम एच ०९-इ एम -५३५४ हा महामार्गावरील पीरलोटे येथे एका वळणावर पलटी झाला. दुपारी ३.३० वाजता घडलेल्या या अपघातानंतर टँकरमधील रसायन रस्त्यावर पसरल्याने परिसरात घबराट निर्माण झाली. अपघातामुळे महामार्गावरील वाहतुक सुमारे तासभर ठप्प झाली होती.

हेही वाचा-त्या बनल्या गावासाठी आरोग्य देवदूत ; केली संपूर्ण गावाची वैद्यकीय तपासणी  अन् -

घटनास्थळावरून  मिळालेल्या माहितीनुसार

लोटे औद्योगिक वसाहतीतील रासायनिक खते तयार करणाऱ्या एका कंपनीचे बाय-प्रॉडक्ट असलेले हायड्रोक्लोरिक अँसिड घेऊन टैँकर चालक इचलकरंजी येथे जायला निघाला होता. महामार्गावरील पीरलोटे येथे हा टँकर आला असता एका अवघड वळणावर चालकाचा टँकरवरील ताबा सुटला आणि टँकर रस्त्याच्या कडेला पलटी झाला. या अपघातानंतर टँकरमधील रसायन रस्त्यावरून वाहू लागल्याने परिसरातील नागरिकांमध्ये घबराटीचे वातावरण निर्माण  झाले होते. महामार्ग वाहतुकीसही बंद झाल्याने रस्त्याच्या दुतर्फा वाहनांच्या रांगा लागल्या. 

हेही वाचा- शेताच्या बांधावर नको पण केंद्रात तरी खतं द्या..... -

रस्त्यावर वाहणाऱ्या  रसायनाची तीव्रता कमी असल्याने या रसायनामुळे जीवसृष्टीला फारसा त्रास झाला नाही. अपघाताची खबर मिळताच खेड पोलिसांनी तात्काळ घटनास्थळी धाव घेतली. लोटे औद्योगिक वसाहतीचा अग्नीशमन बंबही तात्काळ घटनास्थळी दाखल झाला. अग्निशमन दलाच्या जवानांनी रस्त्यावर पसरलेल्या रसायनावर पाणी मारून त्याची तीव्रता कमी केल्यावर महामार्गावर थांबलेली वाहतुक सुरु करण्यात आली. या अपघातात चालक जखमी झाला असून त्याला नजीकच्या रुग्णालयात दाखल करण्यात आले आहे.