97611
78199

आणखी १४ गावांना होणार सनद वाटप

गावठाण भूमापन; फणसवडे गेळेतील काम आधीच पूर्ण

ओरोस, ता. २५ ः जिल्हा अधीक्षक भूमी अभिलेख कार्यालयाअंतर्गत स्वामित्व योजनेमधून जिल्ह्यातील गावठाण क्षेत्र असलेल्या १६ गावांचे ड्रोनद्वारे भूमापन केले होते. यातील फणसवडे व गेळे गावातील सनद वाटपाचे काम यापूर्वी पूर्ण झाले असून १०० टक्के सनद शुल्क वसुली करण्यात आली आहे. उर्वरित १४ पैकी दहा गावांची सनद वाटप उद्या (ता.२६) पालकमंत्री रवींद्र चव्हाण यांच्या हस्ते करण्यात येणार आहे, अशी माहिती जिल्हा अधीक्षक भूमी अभिलेख डॉ. विजय वीर यांनी आज दिली.
ज्या गावांमध्ये पूर्वीच नगर भूमापन झालेले आहे, त्या गावांमध्ये तसेच पुनर्वसित गावात गावठाण असल्यास त्या गावांमध्ये ही ड्रोन फ्लाईंगद्वारे भुमोजणी करण्यात आली. मोजणी करताना चुना मार्किंग करून त्याचा नकाशा सर्व्हे ऑफ इंडियाला पाठविला गेला आहे. स्वामित्व योजने अंतर्गत गावठाण क्षेत्र लाभलेल्या जिल्ह्यातील १६ गावांचे ड्रोनद्वारे भूमापन केले आहे. जिल्ह्यातील गावठाण क्षेत्राचे ड्रोनद्वारे भूमापन करण्यास २४ नोव्हेंबर २०२१ पासून सुरुवात केली होती. जिल्ह्यातील अशाप्रकारे मोजणी करून गावठाण क्षेत्राची जमीन मोजणी व हद्द निश्चिती करण्यास सुरुवात केली होती. पहिल्या टप्प्यात पाट, कलंबिस्त, गेळे, फणसवडे, मासुरे या पाच गावांची ड्रोनद्वारे हद्द निश्चिती करण्यात आली होती.
जिल्ह्यात गावठाण क्षेत्र असलेले व हद्द निश्चिती न झालेले एकूण १९ गावं होते. यात मालमत्ता सर्व्हे नंबर मिळालेले १३ तर मालमत्ता सर्व्हे नंबर न मिळालेले ६ गाव होते. सर्व्हे नंबर मिळालेल्या गावांत कुडाळ तालुक्यातील अणाव, सावंतवाडी तालुक्यातील गेळे, चौकुळ, फणसवडे, नेने, मासुरे, केगाद. मालवण तालुक्यातील सडेवाडी, पिरावाडी, कट्टा. देवगड तालुक्यातील लिंगडाळ, धालवली, दोडामार्ग तालुक्यातील वझरे या १३ गावांचा समावेश आहे. सर्व्हे नंबर न मिळालेल्या गावांत कुडाळ तालुक्यातील पाट, सावंतवाडी तालुक्यातील कलंबिस्त, देवगड तालुक्यातील तोरसोळे, किंजवडे आणि दोडामार्ग तालुक्यातील घोटगेवाडी, मोर्ले या गावांचा समावेश आहे.
सिंधुदुर्गात गावठाण जमिन वादातून मोजणीसाठी बरीच मागणी असते; मात्र इथल्या दुर्गम भौगोलिक स्थितीमुळे यात अडचणी येतात. यासाठी ड्रोनद्वारे भूमापनाची योजना येथे प्रभावी ठरत आहे. ड्रोनद्वारे गावठाण क्षेत्रातील भूमापन करण्याची योजना राज्याच्या ग्रामविकास विभाग, महसूल विभाग व भारतीय सर्व्हेक्षण विभागाने आणली आहे. याचा प्रारंभ कोल्हापुर, सांगली व सातारा या जिल्ह्यात झाल्यानंतर तळकोकणात असलेल्या सिंधुदुर्ग जिल्ह्यात ही अत्याधुनिक व पारदर्शी भूमापन पद्धत सुरु झाली आहे.
-----------
चौकट
सनद म्हणजे काय?
भूमी अभिलेख कार्यालयाकडून ड्रोनद्वारे भूमापन झालेल्या गावांना सनद देण्याचे काम सध्या सुरू आहे. ही सनद म्हणजे ड्रोनद्वारे भूमापन केल्यानंतर तयार झालेल्या जमिनीच्या नकाशाच्या क्षेत्राची भूमी अभिलेखच्या उपअधीक्षक यांच्या मार्फत प्रत्यक्ष जागेवर जावून चौकशीची कार्यवाही करून अंतिम करण्यात आलेल्या क्षेत्राचा नकाशा व जमीन धारकाचा मालकी हक्क दर्शविणारा दस्तऐवज होय.
-----------
चौकट
सनद दिली जाणारी दहा गावे
पाट, फणसवडे, गेळे, मासुरे, कलंबिस्त, मोर्ले, वझरे, धालवली, किंजवडे, लिंगडाळ, तोरसोळे, अणाव, घोडगेवाडी, चौकुळ, केगाद, नेने या १६ गावठाण क्षेत्राची ड्रोनद्वारे भूमोजणी पूर्ण झाली आहे. कट्टा, पिरावाडी, सडेवाडी येथे मालकी हक्काचे स्वतंत्र सातबारा असल्याने हे गाव वगळण्यात आले आहेत. ड्रॉन फ्लाईंगद्वारे मोजणी झालेल्या १६ गावातील फणसवडे, गेळे या गावांची सनद वाटप यापूर्वी करण्यात आले आहे. पाट, अणाव, वझरे, मोर्ले, कलंबिस्त, मासुरे, तोरसोळे, धालवली, लिंगडाळ, किंजवडे या दहा गावांची सनद वाटप उद्या पालकमंत्री चव्हाण यांच्याहस्ते करण्यात येणार आहे. मात्र, घोडगेवाडी, चौकुळ, केगाद, नेने या गावांची सनद अजून पूर्ण झालेली नाही. ती पूर्ण झाल्यावर त्याचे वाटप करण्यात येणार आहे.
-----------
चौकट
मिळकत पत्रिकेचेही वाटप
ड्रोनद्वारे भूमापन केल्याने गावठाणातील मालमत्ताचे जीआयएस आधारित रेखांकन व मूल्यांकन झाले असून गावठाणातील प्रत्येक घराचा नकाशा, गावठाणातील प्रत्येक खुल्या जागेचा, रस्त्याचा नकाशा तयार करण्यात आला आहे. गावठाणातील प्रत्येक घर, खुली जागा, रस्ता, गल्ली, नाला यांना भूमापन क्रमांक देण्यात आला आहे. प्रत्येक मिळकतीची महाराष्ट्र जमीन महसूल अधिनियम, १९६६ च्या तरतूदीनुसार मिळकत पत्रिका तयार करून त्याचे वाटप करण्यात येत आहे.
-----------
कोट
ड्रोनद्वारे भूमापन केल्याने शासनाच्या मिळकतींचे संरक्षण झाले असून मिळकतींचा नकाशा व सीमा निश्चित झाली आहे. मालकी हक्काचे अभिलेख व मिळकत पत्रिका तयार झाल्या आहेत. सीमा निश्चिती झाल्याने सरकारी मिळकतींवरचे अतिक्रमण रोखणे शक्य झाले आहे. परिणामी मिळकतींना बाजारपेठेत तरलता येऊन गावाची आर्थिक पत उंचावण्यास मदत होणार आहे. ग्रामपंचायतीला गावातील कर आकारणी, बांधकाम परवानगी, अतिक्रमण निर्मूलन यासाठी अभिलेख व नकाशा उपलब्ध झाले आहेत. यामुळे थ्रीडी इमेज प्राप्त होत असल्याने विविध विकास यंत्रणा व विभागाना नियोजन करताना सुलभता येणार आहे.
- डॉ. विजय वीर, जिल्हा अधीक्षक, भूमी अभिलेख अधिकारी