वैभववाडी : कडकडीत उन्हामुळे (Sindhudurg Temperature) जिल्ह्यातील बहुतांश नद्या आणि लघुप्रकल्पांतील पाण्यामध्ये झपाट्याने घट होऊ लागली आहे. त्यामुळे नद्यांच्या पाण्यावर अवलंबून असलेली शेकडो एकर शेती संकटात येण्याची चिन्हे निर्माण झाली आहेत. पाण्याची अधिक गरज असलेल्या ऊसशेतीही अडचणीत येण्याची शक्यता आहे. तापमानवाढ कायम राहिल्यास जिल्ह्यात भीषण पाणीटंचाई निर्माण होण्याचे संकेत आतापासूनच मिळू लागले आहेत.

सिंधुदुर्ग गेल्या काही दिवसांपासून चांगलाच तापला आहे. जिल्ह्याच्या विविध भागांतील तापमान सरासरी ३६ ते ३८ अंश सेल्सियसपर्यंत (Summer Season) पोहोचले आहे. आज दुपारीही जिल्ह्याच्या अनेक भागांत तापमान ३७ ते ३८ अंश सेल्सियस होते. मात्र, त्याची तीव्रता ४० अंश सेल्सियस असल्याचे जाणवत होते.

कडक उष्मा आणि त्यात ढगाळ वातावरण यामुळे उन्हाची तीव्रता अधिक जाणवत होती. वाढलेल्या तापमानाचा एकीकडे जिल्ह्यात प्रमुख आंबा, काजू पिकांवर (Cashew Crop) परिणाम होत असताना आता नद्या आणि लघुप्रकल्पातील पाणीसाठ्यावर मोठा परिणाम होत असल्याचे स्पष्ट झाले आहे. जिल्ह्यातील नद्यांच्या पाणीपातळीत झपाट्याने घट होऊ लागली आहे. काही नद्यांची पात्रे कोरडी पडू लागली आहेत. वैभववाडी तालुक्यातील शुक नदी, कणकवलीतील जानवली, गड यासारख्या नद्यांच्या पाणीपातळीत कमालीची घट झाली आहे.

वैभववाडीतील शुकनदीच्या पाण्यावर शेकडो एकर ऊसशेती अवलंबून आहे. या नदीचे पात्र कोरडे पडल्यामुळे ही शेती संकटात येण्याची शक्यता निर्माण झाली आहे. या भागातील शेतकऱ्यांनी खांबलवाडी प्रकल्पाचे पाणी शुक नदीपात्रात सोडण्याची मागणी केली आहे. हीच स्थिती संपूर्ण जिल्ह्यात आहे. तापमानाची तीव्रता कायम राहिल्यास जिल्ह्यात पाण्याची स्थिती गंभीर बनणार आहे. शेतीच्या पाण्याबरोबरच पिण्याच्या पाण्याचा प्रश्नदेखील गंभीर बनण्याचा अंदाज आहे.

पाणीटंचाईचे संकेत

जिल्ह्याच्या अनेक भागांत एप्रिलच्या पहिल्या आठवड्यात शेतीकरिता पाणी कमी पडू लागले आहे. पावसाळा सुरू होण्यास अजूनही दोन महिने शिल्लक आहेत. त्यामुळे यावर्षी मे महिन्यात भीषण पाणीटंचाईचे संकेत मिळू लागले आहेत.