घाग, शिंदे यांचा प्रामाणिकपणा
रोकडसह दागिन्यांची सापडलेली पर्स केली परत
सकाळ वृत्तसेवा
राजापूर, ता. २७ ः तालुक्यातील चंद्रकांत राजाराम शिंदे आणि नितीन दशरथ घाग यांना पाचल बाजारपेठेत अज्ञात व्यक्तीची पर्स मिळाली. त्यामध्ये रोख रक्कमेसह सोन्याची नथ होती. त्यांनी ती पर्स वैभववाडी येथील भिकाजी सुतार यांचे चिरंजीव अथर्व भिकाजी सुतार यांच्याकडे सुपुर्द करण्यात आली. घाग आणि शिंदे यांच्या प्रामाणिकपणाचे सर्वत्र कौतुक होत आहे.
याबाबत मिळालेल्या माहितीनुसार, पाचल बाजारपेठेतील हॉटेल वैभवसमोर चंद्रकांत राजाराम शिंदे व नितीन दशरथ घाग (रा. काजिर्डा ता. राजापूर) यांना एक पर्स सापडली. ती पर्स त्यांनी रायपाटण पोलिस दूरक्षेत्र येथे पोलिसांच्या स्वाधीन केली. पोलिसांनी ती पर्स उघडून पहिली असता त्यात चार हजार रुपये व एक सोन्याची नथ होती. त्यामध्ये भिकाजी सुतार (रा जांभवडे, पालांडेवाडी, ता. वैभववाडी जि. सिंधुदुर्ग) यांचे आधारकार्ड होते. आधारकार्डावरील माहितीनुसार, पोलिसांनी शोध घेतला असता ती पर्स भिकाजी सुतार यांची पत्नी सरस्वती सुतार यांची असल्याची माहिती मिळाली. ती पर्स अथर्व भिकाजी सुतार (जांभवडे पालांडेवाडी, ता. वैभववाडी, जि. सिंधुदुर्ग) यांच्याकडे सुपूर्द करण्यात आली.