72288

आवळेगाव येथे शेतकऱ्यांना
पीक पद्धतीबाबत मार्गदर्शन

सकाळ वृत्तसेवा
कुडाळ, ता. २२ ः आवळेगाव (ता.कुडाळ) येथे तालुका कृषी अधिकारी कार्यालयातर्फे राष्ट्रीय अन्न सुरक्षा आणि पोषण अभियान अंतर्गत पीक पद्धतीवर प्रशिक्षण मार्गदर्शन सत्राचे आयोजन केले होते. यावेळी तालुका कृषी अधिकारी भास्कर चौगले यांनी शेतकऱ्यांना पौष्टिक तृणधान्यांचे महत्त्व, लागवड पद्धती आणि त्याचे फायदे याबद्दल सविस्तर माहिती दिली.
या मार्गदर्शन सत्रादरम्यान, विशेषतः नाचणी बियाणे पेरणीचे प्रात्यक्षिक दाखविले. तालुका कृषी अधिकाऱ्यांनी उपस्थित राहून नाचणीची योग्य पद्धतीने पेरणी कशी करावी, बियाण्यांची निवड कशी असावी, आणि पिकाची काळजी कशी घ्यावी याबद्दल शेतकऱ्यांना मार्गदर्शन केले. या उपक्रमामुळे आवळेगाव येथील शेतकऱ्यांना पौष्टिक तृणधान्य लागवडीसाठी प्रोत्साहन मिळाले असून, पारंपरिक पिकांबरोबरच आरोग्यदायी आणि आर्थिकदृष्ट्या फायदेशीर अशा नाचणीसारख्या पिकांच्या लागवडीकडे वळण्यास मदत होणार आहे. तसेच कृषी अधिकारी, अमोल करंदीकर यांनी मृदा परीक्षण बाबत मार्गदर्शन केले. उपकृषी अधिकारी वाडेकर यांनी शेतकऱ्यांना महात्मा गांधी राष्ट्रीय रोजगार हमी योजनेचा लाभ घ्यावा यासाठी आवाहन केले. सहाय्यक कृषी अधिकारी श्रीमती प्रिया खरवडे यांनी शेतकऱ्यांना फार्मर आयडी काढून घेण्याबाबत मार्गदर्शन केले. फार्मर आयडीशिवाय कोणत्याही शासकीय योजनांचा लाभ मिळणार नाही, तसेच नुकसान भरपाई सुद्धा मिळणार नाही, असे सांगितले.