72500

ग्राहक अधिकारांबाबत जागृती करा

प्रा. एस. एन. पाटील ः कुडाळात ग्राहक पंचायत संस्थेची सभा

सकाळ वृत्तसेवा
कुडाळ, ता. २३ ः ग्राहकांना आपले अधिकार माहीत असणे गरजेचे आहेत. त्यासाठी ग्राहक पंचायतने सिंधुदुर्ग जिल्ह्यात संघटन वाढवण्यासाठी तालुकावार शाखा पुनर्बांधणीचा कार्यक्रम हाती घेतला आहे, अशी माहिती ग्राहक पंचायत महाराष्ट्रचे जिल्हाध्यक्ष प्रा. एस. एन. पाटील यांनी दिली. कुडाळ तालुका शाखा कार्यकारिणी निवडप्रसंगी ते बोलत होते.
यावेळी कुडाळ तालुका शाखाध्यक्षपदी प्रदीप शिंदे यांची निवड करण्यात आली. ग्राहक पंचायत महाराष्ट्र संस्थेच्या राज्य कार्यकारिणीच्या सूचनेनुसार कुडाळ तालुका कार्यकारिणी पुनर्बांधणी करण्यासाठीची बैठक संत राऊळ महाराज महाविद्यालय कुडाळ येथे जिल्हाध्यक्ष प्रा. पाटील यांच्या अध्यक्षतेखाली आयोजित करण्यात आली. या बैठकीला जिल्हा सचिव संदेश तुळसणकर, उपाध्यक्ष सीताराम ऊर्फ दादा कुडतरकर, संघटक विष्णूप्रसाद दळवी, सहसंघटक रिमा भोसले, सहसचिव सुगंधा देवरुखकर, नंदकिशोर साळसकर, कुडाळचे माजी अध्यक्ष आनंद मेस्त्री आदी उपस्थित होते.
तुळसणकर, दादा कुडतरकर, भोसले, दळवी यांच्यासह जिल्हाध्यक्ष प्रा. पाटील यांनी ग्राहक चळवळीची आवश्यकता आणि त्या अनुषंगाने ग्राहक पंचायत महाराष्ट्र या संघटनेच्या कार्याविषयी माहिती दिली. आपली तालुका शाखा सक्षम करा. स्थानिक ग्राहकांना न्याय द्या, त्यांचे प्रश्न सोडवा, असे आवाहन प्रा. पाटील यांनी यावेळी केले.
त्यांनतर कुडाळ तालुक्याची कार्यकारिणी निवडली. यात अध्यक्षपदी शिंदे, उपाध्यक्ष सुदाम राणे, सचिव प्रा. अजित कानशिडे, सहसचिव वसंत कदम, संघटक प्रा. नितीन बांबर्डेकर, सहसंघटक नरेंद्र गवंडे, प्रसिद्धी प्रमुख नीलेश जोशी, कोषाध्यक्ष प्रा. अरुण मर्गज, सदस्य पांडुरंग तोरसकर, सल्लागार आनंद मेस्त्री यांची निवड केली. जिल्हाध्यक्ष पाटील यांच्या हस्ते नूतन अध्यक्ष शिंदे यांना नियुक्‍तिपत्र दिले. नूतन अध्यक्ष शिंदे यांनी ग्राहक जनजागृतीचे काम प्राधान्याने हाती घेणार असल्याचे सांगितले. आनंद मेस्त्री यांनी प्रास्ताविक केले. जिल्हा सचिव प्रा. तुळसणकर यांनी आभार मानले.