दोडामार्गच्या चार शिक्षिकेंना
निवृत्तीनंतरचा लाभ मिळेना

चंद्रकांत अणावकर ः प्रसंगी आंदोलन

सकाळ वृत्तसेवा
सिंधुदुर्गनगरी, ता. २३ ः तालुक्यातील नऊ महिन्यांपूर्वी निवृत्त झालेल्या चार महिला शिक्षिकेंना निवृत्तीनंतर मिळणारे आर्थिक लाभ अद्याप मिळालेले नाहीत. त्यांच्यावरील अन्याय तातडीने दूर न झाल्यास दोडामार्ग गटविकास अधिकारी कार्यालयासमोर आंदोलन छेडू, असा इशारा सिंधुदुर्ग जिल्हा पेन्शनर्स असोसिएशनचे सल्लागार चंद्रकांत अणावकर यांनी दिला आहे.
तालुक्यातील चार महिला शिक्षिका ऑगस्ट २०२४ ला निवृत्त झाल्या. मात्र, निवृत्तीनंतर मिळणारे कोणतेही आर्थिक लाभ त्यांना अद्याप दिलेले नाहीत. त्याकडे लक्ष वेधण्यासाठी सिंधुदुर्ग पेन्शनर्स असोसिएशनचे सल्लागार आणावकर, उपाध्यक्ष सुरेश पेडणेकर, सदस्य सुधाकर देवस्थळी यांनी दोडामार्ग तालुका गटविकास अधिकाऱ्यांची भेट घेऊन निवृत्त शिक्षकांवर सुरू असलेल्या अन्यायांकडे त्यांचे लक्ष वेधले. तसेच त्यांच्यावरील अन्याय तातडीने दूर करावा, अशी मागणी केली आहे.
गेल्या पंचवीस वर्षांत कार्यक्षम आणि प्रभावी असा कर्मचारी वर्ग गटशिक्षण कार्यालयात नसल्यामुळे या तालुक्यातील शिक्षकांचे आणि निवृत्त शिक्षकांचे प्रश्न दीर्घकाळ प्रलंबित आहेत. त्याची दखल घेतली जात नाही. सध्या नियुक्त दोन कर्मचाऱ्यांपैकी एक कर्मचारी वैद्यकीय रजेवर आहे, तर दुसरा नवीन कर्मचारी असल्यामुळे त्यांना पेन्शन प्रस्ताव निवड श्रेणीचे प्रस्ताव वरिष्ठ वेतन श्रेणीचे प्रस्ताव तयार करायला जमत नसल्याचे दिसते. त्यामुळे ही समस्या निर्माण झाली असून, कार्यरत शिक्षक आणि निवृत्त शिक्षकांमध्ये असंतोष पसरला आहे. तालुक्यातील निवृत्त महिला प्राथमिक शिक्षकांवरील होत असलेला अन्याय तातडीने दूर करावा; अन्यथा दोडामार्ग तालुका गटविकास अधिकारी कार्यालयसमोर आंदोलन करावे लागेल, असा इशारा श्री. अणावकर यांच्यासह पेन्शनर्स असोसिएशनच्या पदाधिकाऱ्यांनी दिला आहे.