जीवनात योगाचा समावेश आवश्यक
विशाल भोसले ः पालिका, ‘आनंदमय’तर्फे योगा प्रात्यक्षिकं
सकाळ वृत्तसेवा
चिपळूण, ता. २४ ः दैनंदिन धावपळीच्या जीवनात शरीर व मन ताजेतवाने ठेवण्यासाठी योगाचा नियमित सराव अत्यंत आवश्यक आहे. फक्त एका दिवसापुरता नव्हे तर दररोजच्या आयुष्यात योगशास्त्राचा समावेश होणे ही काळाची गरज आहे, असे प्रतिपादन चिपळूण पालिकेचे मुख्याधिकारी विशाल भोसले यांनी केले.
चिपळूण नगरपालिका व आनंदमय योगा स्टुडिओ यांच्या संयुक्त विद्यमाने इंदिरा गांधी सांस्कृतिक केंद्रात योगदिन साजरा करण्यात आला. या प्रसंगी एनडीआरएफचे इन्स्पेक्टर प्रमोद रॉय, प्रशासकीय अधिकारी मंगेश पेढांबकर, स्टुडिओच्या संचालिका डॉ. प्रियांका हळदणकर आदी उपस्थित होते. या वेळी मुख्याधिकारी भोसले म्हणाले, शहरातील नागरिक आरोग्यदायी आणि सक्रिय राहावेत यासाठी अशा उपक्रमांची गरज आहे. योगामुळे मन:शांती, एकाग्रता आणि कार्यक्षमता वाढते. पालिकेच्या पुढाकारातून भविष्यातही योगविषयक उपक्रम राबवण्याचे संकेत त्यांनी दिले. प्रमुख वक्त्या डॉ. प्रियांका हळदणकर यांनी प्राणायाम, स्ट्रेचिंग, फ्लेक्सिबिलिटी यासारख्या सहज व प्रभावी योगाभ्यासांची माहिती दिली आणि काही आसनांचे प्रात्यक्षिकही सादर केले. या कार्यक्रमाचे आयोजन उद्यान विभागप्रमुख बापू साडविलकर यांनी केले.
---