‘येतंव’बाबत आज
सावंतवाडीत धडे
सावंतवाडी ः सिंधुदुर्ग व्यापारी महासंघाने विकसित केलेल्या ‘येतंव’ प्रवासी अॅपविषयी माहिती व मार्गदर्शन कार्यक्रम उद्या (ता. २५) दुपारी ३ वाजता येथील बॅ. नाथ पै सभागृहाच्या बाजूच्या हॉलमध्ये आयोजित केला. आहे. या कार्यक्रमाचे आयोजन जिल्हा व्यापारी महासंघ आणि कोकण विभाग रिक्षा टॅक्सी महासंघातर्फे केले आहे. अॅपचे सदस्य आनंद वामनसे (मुंबई) उपस्थित राहून प्रवासी, रिक्षाचालक-मालक, व्यापाऱ्यांना मार्गदर्शन करतील. अॅपचे लोकार्पण पालकमंत्री नीतेश राणे यांच्या हस्ते १८ मे रोजी झाले होते. या अॅपची प्रवाशांना, रिक्षाचालक-मालकांना व व्यापाऱ्यांना माहिती व्हावी, यासाठी मार्गदर्शन कार्यक्रम घेण्यात येत आहेत. या अॅपमुळे प्रवाशांना त्यांच्या जवळच्या रिक्षा स्थानकावर उभ्या असलेल्या रिक्षाचालकांचे थेट नंबर दिसतात. ज्यामुळे त्यांना कॉल किंवा व्हॉट्सअॅप करून रिक्षा जागेवर बोलावणे सोपे झाले आहे. सावंतवाडी तालुक्यातील सर्व रिक्षा चालक-मालक, व्यापारी, प्रवाशांनी या कार्यक्रमाला उपस्थित राहण्याचे आवाहन कोकण रिक्षा-टॅक्सी महासंघाचे सहसचिव तथा सिंधुदुर्ग जिल्हा रिक्षा संघटनेचे सचिव सुधीर पराडकर यांनी केले आहे.
-----
सावंतवाडीत रविवारी
बुद्धिबळ कार्यशाळा
सावंतवाडी ः मुक्ताई ॲकॅडमीने शालेय आणि महाविद्यालयीन विद्यार्थ्यांसाठी कॅरम आणि बुद्धिबळ कोचिंग कार्यशाळेचे आयोजन केले आहे. पुढील महिन्यात होणाऱ्या शालेय स्पर्धेच्या आणि ॲकॅडमीच्या स्पर्धेच्या तयारीसाठी ही कार्यशाळा घेण्यात येत आहे. सावंतवाडी येथील श्री पंचम खेमराज महाविद्यालयाच्या हॉलमध्ये रविवारी (ता. २९) सकाळी ९.३० ते दुपारी १.३० या वेळेत कार्यशाळा होईल. कौस्तुभ पेडणेकर हे कॅरमचे आणि राष्ट्रीय बुद्धिबळ खेळाडू बाळकृष्ण पेडणेकर बुद्धिबळाचे मार्गदर्शन करणार आहेत. नाव नोंदणीसाठी कौस्तुभ पेडणेकर यांच्याशी संपर्क करावा. सहभागी विद्यार्थ्यांना प्रशस्तीपत्र देण्यात येईल. जास्तीत जास्त विद्यार्थ्यांनी या कार्यशाळेत सहभाग घेण्याचे आवाहन पेडणेकर यांनी केले आहे.
...............
सावंतवाडीत आज
रेल्वे प्रवाशांची सभा
सावंतवाडी ः कोकण रेल्वे प्रवासी संघटना सावंतवाडीतर्फे उद्या (ता. २५) सायंकाळी ५ वाजता श्रीराम वाचन मंदिर, सावंतवाडी येथे संघटना सदस्य आणि टर्मिनसप्रेमींची बैठक आयोजित केली आहे. या बैठकीत सावंतवाडी टर्मिनस भूमिपूजन कार्यक्रमाला दहा वर्षे पूर्ण होत असल्याच्या पार्श्वभूमीवर विचारविनिमय करण्यात येणार आहे. यासंदर्भात पुढील दिशा काय असावी, यावर चर्चा आणि निर्णय घेतले जातील. कोकण रेल्वे प्रवासी संघटना सावंतवाडीचे अध्यक्ष अॅड. संदीप निंबाळकर यांनी समूहातील सर्व सदस्यांना या बैठकीला उपस्थित राहण्याचे आवाहन केले आहे.
.................
पाडलोस येथे
जुलैला कृषी दिन
सावंतवाडी ः पाडलोस येथे १ जुलैला कृषी दिन विविध उपक्रमांनी साजरा करण्यात येणार आहे. पंचायत समिती, कृषी विभाग, ग्रामपंचायत पाड़लोस यांच्या संयुक्त विद्यमाने पाडलोस ग्रामपंचायत (कृषी तंत्र विद्यालय, पाडलोस) येथे सकाळी १०.३० वाजता हा कार्यक्रम होणार आहे. उपस्थित राहण्याचे आवाहन पाडलोस ग्रामपंचायतीने केले आहे.