एनसीसी भवनाचे आज भूमीपूजन
सकाळ वृत्तसेवा
रत्नागिरी, ता. २६ : कुवारबाव येथे एनसीसी भवनाचे भूमीपूजन उद्या (ता. २७) सकाळी १०.३० वाजता पालकमंत्री उदय सामंत यांच्या हस्ते होणार आहे. या कार्यक्रमाला एनसीसी गटमुख्यालयाचे ब्रिगेडियर आर. के. पठणकर आणि जिल्हाधिकारी एम. देवेंदर सिंह प्रमुख उपस्थित राहणार आहेत.
२ महाराष्ट्र नेव्हल युनिट एनसीसीच्या अनेक वर्षांच्या मागणीमुळे आता हे भवन प्रत्यक्षात होणार असून, याचा फायदा एनसीसी छात्रांना मिळणार आहे. कुवारबाव येथील होमगार्ड प्रशिक्षण केंद्राशेजारी जागेवर होणाऱ्या या भवनाचे क्षेत्रफळ ४३४३.५० चौरस फूट आहे. जवळपास ४२ कोटींचे अंदाजपत्रक बनवण्यात आले आहे. एनसीसी भवनाची मागणी सुमारे दहा वर्षे करण्यात येत होती; मात्र जागा मिळूनही त्याला निधी मिळाला नव्हता; परंतु पालकमंत्री उदय सामंत यांनी लक्ष घातल्याने या भवनासाठी भरघोस निधी प्राप्त झाला. या भवनाकरिता २ महाराष्ट्र नेव्हल युनिटचे कमांडिंग ऑफिसर कमांडर के. राजेश कुमार यांनी मेहनत घेतली आहे.