swt267.jpg
73267
मालवणः गाबीत समाजातर्फे आयोजित सत्कार कार्यक्रमप्रसंगी गुणवंत विद्यार्थ्यांसोबत मान्यवर.

गुणगौरवामुळे उत्तरदायित्वाची जाणीव
रामचंद्र कुबलः मालवणात गाबीत समाजातर्फे विद्यार्थ्यांचा सत्कार
सकाळ वृत्तसेवा
मालवण, ता. २६ : आजच्या सत्काराने विद्यार्थ्यांवर गाबीत समाजाला पुढे नेण्याचे उत्तरदायित्व आले आहे. मुलांनी करियरची मोठी स्वप्ने बघून ती पूर्ण करण्यासाठी प्रचंड मेहनत घ्यावी. गाबीत समाजातील मुलांनी समुद्रतळ ते अंतराळापर्यंत झेप घेण्यासाठी प्रयत्न करावे, असे प्रतिपादन आचरा येथील शिक्षक रामचंद्र कुबल यांनी येथे केले.
दहावी आणि बारावी परीक्षा २०२४-२५ मध्ये उत्तीर्ण झालेल्या तालुक्यातील सर्व गाबीत विद्यार्थी आणि विद्यार्थिनींचा गुणगौरव समारंभ भरड येथील लीलांजली हॉलमध्ये झाला. यावेळी व्यासपीठावर कार्यक्रमाचे अध्यक्ष म्हणून आचरा येथील शिक्षक रामचंद्र कुबल, प्रमुख पाहुणे शिक्षक पांडुरंग कोचरेकर, प्रमुख पाहुणी दिव्या मालंडकर, गाबीत समाज सिंधुदुर्गचे जिल्हाध्यक्ष चंद्रशेखर उपरकर, जिल्हा सचिव महेंद्र पराडकर, मालवण तालुकाध्यक्ष डॉ. प्रमोद कोळंबकर, संजय केळुसकर, राजीव केरकर, भाई कासवकर, अन्वेषा आचरेकर, राहुल सारंग, शिक्षिका संजना सारंग आदी उपस्थित होते.
डॉ. प्रमोद कोळंबकर यांनी प्रास्ताविक करून गाबीत समाज संघटनेच्या कार्याचा आढावा घेतला. यावेळी २०२४-२५ शैक्षणिक वर्षात दहावी आणि बारावी परीक्षेत उत्तीर्ण झालेल्या तालुक्यातील गाबीत समाजातील विद्यार्थ्यांसह स्पर्धा परीक्षांमध्ये यश मिळविलेल्या विद्यार्थ्यांचा प्रशस्तीपत्र व भेटवस्तू देऊन गौरव करण्यात आला. आंतरराष्ट्रीय विज्ञान प्रदर्शनात भारताचे प्रतिनिधित्व केलेल्या देवगड येथील राहुल सारंग व मर्चंट नेव्हीत यशस्वी कामगिरी करणाऱ्या मालवण दांडी येथील दिव्या मालंडकर यांना गौरविण्यात आले.
उपरकर यांनी, आज करियरची अनेक क्षेत्र व संधी निर्माण झाल्या आहेत. गाबीत समाजातील प्रत्येक मुलात गुणवत्ता आहे. मुलांना आवड असलेल्या क्षेत्रात पुढे जाण्यासाठी पालक व शिक्षकांनी मेहनत घेतली पाहिजे, असे आवाहन केले. कोचरेकर यांनी गाबीत समाजातील तज्ज्ञांच्या मार्गदर्शनाचा लाभ मुलांनी घ्यावा, असे सांगितले. संजना सारंग यांनी दहावी व बारावीनंतर काय? याबाबत मार्गदर्शनाची गरज व्यक्त केली. सूत्रसंचालन महेंद्र पराडकर यांनी केले. आभार अन्वेषा आचरेकर यांनी मानले.