swt2620.jpg
73332
देवगडः येथील तहसीलदार आर. जे. पवार यांना ठाकरे गट तालुका शिवसेनेच्यावतीने निवेदन देण्यात आले. (छायाचित्र ः संतोष कुळकर्णी)

देवगड तालुक्यात खतांचा तुटवडा
ठाकरे शिवसेनेचा आरोपः तहसिलदार पवारांचे वेधले लक्ष
सकाळ वृत्तसेवा
देवगड, ता. २६ः तालुक्यातील शेतकऱ्यांना जाणवणाऱ्या खत तुटवड्याकडे तालुका ठाकरे गट शिवसेना पक्षाच्यावतीने येथील तहसीलदार आर. जे. पवार यांचे लक्ष वेधण्यात आले. शेतकऱ्यांना अनुदानित खते उपलब्ध होत नसल्याची बाब यावेळी तहसीलदारांच्या निदर्शनास आणून देण्यात आली. याबाबत आपल्या मागणीचे निवेदन तहसीलदारांना देण्यात आले.
तालुक्यातील शेतकऱ्यांना आवश्यक असलेले खत उपलब्ध होत नसल्याच्या पार्श्‍वभूमीवर ठाकरे गट युवासेना जिल्हाप्रमुख सुशांत नाईक यांच्या नेतृत्वाखाली पदाधिकारी आणि कार्यकर्त्यांनी तहसीलदार श्री. पवार यांची भेट घेतली. यावेळी तालुकाप्रमुख रवींद्र जोगल, तालुकाप्रमुख जयेश नर, महिला तालुकाप्रमुख हर्षा ठाकूर, नगरसेवक तेजस मामघाडी, माजी सभापती रेश्मा सावंत, माजी उपसभापती संजय देवरुखकर, सुनील तेली, बाळा कणेरकर, नगरसेवक नितीन बांदेकर, विकास कोयंडे उपस्थित होते. यावेळी तालुक्यातील शेतकऱ्यांना अनुदानित खत पुरवठा होत नाही असे सांगताच चिरेखाण प्रश्न, देवगड जामसंडे शहराचा पाणीप्रश्न याकडेही तहसीलदारांचे लक्ष वेधण्यात आले. यावेळी तालुका कृषि विभागाच्या प्रतिनिधींशीही चर्चा करण्यात आली. आपल्या मागणीचे निवेदन तहसीलदारांना देण्यात आले. निवेदनात म्हटले आहे, तालुक्यात कृषि विभागामार्फत शेतकऱ्यांना शेतीसाठी उपयुक्त असलेल्या खतांचे वाटप करण्यात आले. यात काही शेतकऱ्यांनाच याचा लाभ मिळाला आहे. बाकी शेतकऱ्यांना या खतांचा तुटवडा भासत आहे. यामुळे शेतकऱ्यांची शेतीची कामे मोठ्या प्रमाणात रखडली आहेत. विविध प्रकारच्या शेतीसाठी उपयुक्त असलेल्या खतांचा तुटवडा तालुक्यातील शेतकऱ्यांना भासत आहे. ही खते तालुक्यातील शेतकऱ्यांना शेतीसाठी अतिशय महत्वाची असून या सर्व खतांचा तुटवडा आहे. भात शेतीसाठी मिश्रखते लागतात. यामुळे शेतकऱ्यांची लावणीची कामे रखडलेली आहेत. यासाठी शेतकऱ्यांना उपयुक्त असलेली खते लवकरात लवकर उपलब्ध करून द्यावीत; अन्यथा पक्षाच्यावतीने तीव्र आंदोलन छेडण्यात यईल, असा इशारा देण्यात आला आहे.

चौकट
शेतकऱ्यांना संपर्क साधण्याचे आवाहन
खाजगी विक्रेते चढ्यादराने या खतांची विक्री करत असल्यास शेतकऱ्यांनी ती चढ्यादराने विकत घेऊ नयेत. कोणता खासगी विक्रेता अशा जादा दराने खतांची विक्री करत असल्यास शेतकऱ्यांनी पक्ष कार्यालयात संपर्क साधावा असे आवाहनही निवेदनाद्वारे केले आहे. शेतकऱ्यांना आवश्यक असलेली खते वेळीच उपलब्ध होण्याची आवश्यकता यावेळी व्यक्त करण्यात आली.