पणजीत १० जुलैला
पोस्टल पेन्शन अदालत
पावस ः टपाल विभागाच्या निवृत्ती वेतनधारकांसाठी/कुटुंब निवृत्ती वेतनधारकांसाठी पणजी येथे पोस्टल पेन्शन अदालत १० जुलैला दुपारी तीन वाजता पोस्टमास्तर जनरल, गोवा क्षेत्र, पणजी यांच्या कार्यालयात होणार आहे. निवृत्ती वेतनधारकांच्या लाभाशी संबंधित तक्रारी, जे टपाल विभागातून निवृत्त झाले आहेत/ज्यांचा सेवेत असताना मृत्यू झाला आहे, टपाल विभाग महाराष्ट्र राज्यातील सांगली, कोल्हापूर, रत्नागिरी आणि सिंधुदुर्ग जिल्हे आणि गोवा राज्यांचे निवृत्ती वेतनधारकांच्या लाभांशी संबंधित तक्रारींचा निपटारा झालेला नाही, अशा प्रकारणांचा डाक पेन्शन अदालतमध्ये विचार केला जाईल. निवृत्ती वेतनधारकांनी आपले अर्ज महेश एन. लेखा अधिकारी/सचिव, पेन्शन अदालत, पोस्टमास्तर जनरल, गोवा क्षेत्र, पणजी ४०३००१ यांचे कार्यालय, पणजी यांच्या नावे तीन जुलैपर्यंत पाठवावेत.
-------
श्रेया कदम यांचा
गावभेटीतून संवाद
गावतळे ः दापोलीचे आमदार योगेश कदम यांच्या पत्नी श्रेया कदम दापोली तालुक्यातील खेडोपाड्यात जाऊन महिलावर्गाच्या गाठीभेट घेत आहेत. त्यांनी अगरवायंगणी येथील महिला प्रभागसंघाची भेट घेऊन त्यांच्या अडचणी जाणून घेतल्या. या भागातील शिवसेना महिला आघाडीच्या पदाधिकाऱ्यांची भेट घेतली तसेच अगरवायंगणी हायस्कूलचा निकाल शंभर टक्के लागला असल्याने व त्याच शाळेतील विद्यार्थी नौदलामध्ये दाखल झाल्याने त्याचे व शिक्षकांचे शाळेत जाऊन कौतुक केले. कदम यांच्या या गावभेट दौऱ्यामुळे महिला संघटनेच्या विविध समस्या मार्गी लागणार असल्याने शिवसैनिक महिलांनी सांगितले.
-------------------
आगरवायंगणी विद्यालयात
शाहू महाराज जयंती
गावतळे ः दापोली तालुक्यातील आगरवायंगणी विद्यालयात शाहू महाराज जयंती साजरी झाली. मुख्याध्यापक सत्यवान दळवी यांनी शाहू महाराजांच्या प्रतिमेस पुष्पहार अर्पण केला. विद्यार्थ्यांनी शाहू महाराजांच्या जीवनावर आधारित अनेक प्रसंग सांगितले. शिक्षकांनी शाहू महाराजांविषयी माहिती सादर केली. मुख्याध्यापक सत्यवान दळवी यांनी शाहू महाराजांचा शैक्षणिक दृष्टिकोन स्पष्ट केला.
------
काटवलीत आज
शालेय साहित्य वाटप
साडवली ः काटवली येथील घागवाडी गणेश मंडळ पुरस्कृत विद्यार्थी कल्याणकारी संस्थेतर्फे काटवली परिसरातील गरजू शालेय मुलांना २८ जूनला शैक्षणिक साहित्यांचे वाटप करण्यात आले. देवाची सहाण येथे सकाळी ११ वाजता हा कार्यक्रम होणार आहे. विद्यार्थी, पालकांनी उपस्थित राहावे, असे आवाहन अध्यक्ष शशिकांत घाग यांनी केले आहे.
-----------