73833

‘चिपी’ - पणजी कोच सेवेला प्रतिसाद

‘फ्लाय ९१’, विमानतळ प्रशासनाचा पुढाकार

सकाळ वृत्तसेवा
कुडाळ, ता. २८ : फ्लाय ९१ आणि सिंधुदुर्ग विमानतळ प्रशासनाने संयुक्तपणे सुरू केलेली चिपी विमानतळ ते पणजी (गोवा) दरम्यानची नि:शुल्क कोच सेवा प्रवाशांसाठी एक मोठा दिलासा ठरली आहे. या सेवेमुळे चिपी विमानतळावर उतरलेल्या प्रवाशांना गोव्याच्या मुख्य शहरापर्यंत पोहोचण्यासाठी सहज, सोयीस्कर आणि खर्चिक त्रासाशिवाय प्रवास करता येतो. आरामदायी वातानुकूलित बस, ठराविक वेळापत्रक आणि प्रवाशांच्या गरजांचा विचार करून आखलेला मार्ग यामुळे या सेवेची लोकप्रियता झपाट्याने वाढत आहे. स्थानिकांपासून ते पर्यटकांपर्यंत सर्वांनी या उपक्रमाचे स्वागत केले असून, कोकणातील हवाई सेवा अधिक प्रभावी आणि प्रवासी केंद्रित होण्याच्या दिशेने टाकलेले हे एक महत्त्वपूर्ण पाऊल मानले जात आहे. ही सेवा फ्लाय ९१ची टियर २ आणि टियर ३ शहरांना जोडण्याची कटिबद्धता दर्शविते. पूर्वी गोव्यात आल्यानंतर प्रवासात खूप अडचणी येत होत्या. मात्र, या सेवेमुळे प्रवास केवळ दोन तासांत सुखकर झाला, असे पुण्याहून गोव्यात सहलीसाठी आलेल्या सुमी रहमान यांनी सांगितले. फ्लाय ९१ च्या स्वस्त तिकिटांसोबत विमानतळाची ही कोच सेवा म्हणजे प्रवाशांसाठी एक उत्तम सुविधा आहे. आतापर्यंत कोणत्याही विमान कंपनीने अशी व्यवस्था दिली नव्हती, असे प्रवासी नाझ अहमद यांनी सांगितले. गोमंतकीय प्रवासी गौतम राणे यांनी समाधान व्यक्त करत, ही सेवा नसती तर आम्हाला महागड्या टॅक्सीचा आधार घ्यावा लागला असता. या कोच सेवेने प्रवास केवळ सोपा आणि वेगवानच नाही तर त्रासमुक्त झाल्याचे स्पष्ट केले. पूर्वी सिंधुदुर्गहून पणजीला येण्यासाठी प्रवासाचे नीट नियोजन करावे लागायचे. वेळ आणि खर्च दोन्हींची चिंता वाटायची. मात्र, या सेवेमुळे प्रवास खूपच सुलभ आणि सोयीस्कर झाला आहे, असे श्री. धनंजय यांनी सांगितले.