73851

साहित्य प्रेरणा कट्ट्याचा
आज मासिक कार्यक्रम
सावंतवाडीत ः आजगाव येथील साहित्य प्रेरणा कट्ट्याचा ५६ वा मासिक कार्यक्रम मांद्रे-गोवा येथील साहित्य संगम या संस्थेच्या संयुक्त विद्यमाने उद्या (ता. २९) सायंकाळी ४.३० वाजता मधलावाडा पालये येथे महेंद्र परब यांच्या निवासस्थानी आयोजित केला आहे. साहित्य संगमचा हा ४२१ वा मासिक कार्यक्रम आहे. या कार्यक्रमात कार्यवाह प्रा. गजानन मांद्रेकर यांच्या ‘(कै.) रवींद्र पिंगे यांचे चरित्र आणि साहित्य’ या विषयावरील बीजभाषणाने साहित्य संगमच्या विशेष वार्षिक उपक्रमाचा प्रारंभ होईल. सुप्रसिद्ध साहित्यिक (कै.) जयवंत दळवी यांच्या सध्या चालू असलेल्या जन्मशताब्दीचे औचित्य साधून या कार्यक्रमात ‘जयवंत दळवी समजून घेताना’ या विषयांतर्गत ‘जयवंत दळवी यांचे चरित्र आणि साहित्य’ या संदर्भात दळवींचे पुतणे तथा उद्योजक सचिन दळवी आणि साहित्य प्रेरणा कट्ट्याचे समन्वयक तथा साहित्यिक विनय सौदागर बोलतील. सर्व साहित्यप्रेमींनी या कार्यक्रमास उपस्थित राहावे, असे आवाहन आयोजकांनी केले आहे.
---
सुकळवाड केंद्रशाळा
समिती अध्यक्षपदी पाताडे
सिंधुदुर्गनगरी ः केंद्रशाळा सुकळवाड येथे शालेय व्यवस्थापन समिती अध्यक्ष सुनील पाताडे यांची पुन्हा अध्यक्षपदी बिनविरोध निवड करण्यात आली. केंद्रशाळा सुकळवाड येथे आज शालेय व्यवस्थापन समिती सभा झाली. यामध्ये शालेय व्यवस्थापन समिती २०२५-२६ ते २०२६-२७ या शैक्षणिक वर्षासाठी पुनर्गठित करण्यात आली. पाताडे यांनी गेली दोन वर्षे या पदावर शाळेसाठी चांगले योगदान दिले. आज झालेल्या सभेत त्यांची अध्यक्षपदी फेरनिवड केली. या समितीमध्ये उपाध्यक्ष गीतांजली हिंदळेकर, सदस्य-बाबुराव मसुरकर, अजिंक्य पाताडे, संदीप चव्हाण, दीपक जाधव, वैष्णवी टेंबकर, वेदश्री वाळके, दीपाली पालकर, तृप्ती मयेकर, पूजा मुणगेकर, गायत्री परुळेकर, पूजा चव्हाण, स्थानिक प्राधिकरण सदस्य किशोर पेडणेकर, शिक्षक प्रतिनिधी मधुकर बाचीपळे, स्थानिक शिक्षणतज्ज्ञ कृष्णा पाताडे, सदस्य सचिव बाळकृष्ण नांदोसकर यांचा समावेश आहे.