देवगड किनारी भागात
पावसाची हुलकावणी
देवगड, ता. २९ ः येथील तालुक्याच्या किनारी भागात पावसाची हुलकावणी आहे. आकाश काळवंडून येऊन जोरदार पर्जन्यवृष्टी होईल, असे वाटत असतानाच वाऱ्याच्या वेगाने ढग पुढे सरकतात आणि कडक ऊन पडते. गेली दोन दिवस किनारी भागात असेच वातावरण आहे. दिवसाकाठी एखादी किरकोळ सर पडते. त्यामुळे भातपिके लावलेल्या शेतीसाठी पाणी पुरेसे आहे. मात्र, जोरदार पाऊस पडत नसल्याने वातावरणातील उष्णतेत मोठी वाढ झाली आहे. सध्या भात लावणीची कामे जोरदार सुरू आहेत. अशा वेळी चिखल करण्यासाठी पाण्याची आवश्यकता भासते. मात्र, पावसाची हुलकावणी असल्याने शेतकऱ्यांना अनेक कसरती करीत लावणी उरकावी लागत आहे. किनारी भागात आकाशात अधून-मधून काळे ढग दाटून येतात. यातून जोरदार पाऊस पडेल अशी दाट शक्यता निर्माण होते. मात्र, किनारी भागात सुटणारा जोरदार वारा ढगांना सह्याद्री पट्ट्याकडे सरकवत असल्याचे चित्र आहे. थोड्या वेळात पुन्हा कडक उन्हाच्या झळा सोसाव्या लागतात. दरम्यान, आता आषाढी एकदाशीच्या दरम्यान जोरदार पाऊस होईल, अशी शक्यता वर्तविली जात आहे.