74136

सावंतवाडी रेल्वे स्थानकावर
‘स्त्री मुक्ती’तर्फे ‘सेफ्टी ऑडिट’

सकाळ वृत्तसेवा
सावंतवाडी, ता. ३० ः महाराष्ट्र राज्य ग्रामीण जीवनोन्नती अभियान आणि पीआरआय-सीबीओ कन्वर्जन्स प्रोजेक्ट अंतर्गत महाराष्ट्र स्त्री मुक्ती परिषदेने आज सावंतवाडी रेल्वे स्थानकावर महिलांच्या सुरक्षेबाबत विशेष ‘सेफ्टी ऑडिट’ (सुरक्षा पडताळणी) आयोजित केले. महिलांना सुरक्षित प्रवासाचे वातावरण मिळावे, या उद्धेशाने सकाळी आणि रात्री अशा दोन सत्रांत हे महत्त्वपूर्ण अभियान राबविले.
या ‘सेफ्टी ऑडिट’मध्ये रेल्वे स्थानकावरील विविध पैलूंची बारकाईने तपासणी करण्यात आली. यात रिक्षाचालक, कामगार, प्रवासी, दुकानदार यांच्याशी संवाद साधला. वरिष्ठ वाणिज्य पर्यवेक्षक मधुकर मातोंडकर यांच्याशी विशेष चर्चा करण्यात आली. सुरक्षिततेच्या दृष्टीने महत्त्वाच्या असलेल्या भिंतीवरील सूचना फलक, सीसीटीव्ही कॅमेरे, प्रसाधनगृह, चेंजिंग रुम, जनरल वेटिंग रुम, पिण्याच्या पाण्याची व्यवस्था आणि रेल्वे ट्रॅकवरील स्वच्छतेची प्रत्यक्ष पाहणी केली. यावेळी श्री सिद्धेश्वर ग्रामोत्कर्ष मंडळ तळवडे (एनजीओ) संस्थेचे संचालक नारायण परब, केरळच्या कुटुंबश्री मेंटर श्रीम. गिरिजा, डीआरपी श्रावणी वेटे, बीआरपी श्रीम. प्राची, एलआरपी चैताली गावडे, परी ग्रामसंघ सचिव श्रीम. वैष्णवी, कोषाध्यक्ष रसिका पारकर, सीआरपी बागकर, नवसंजीवनी आरोही बांदिवडेकर तसेच सीआरपी श्रीम. राधिका आदी उपस्थित होते. महिलांच्या सुरक्षेसाठी अशा प्रकारच्या उपक्रमांची गरज अधोरेखित झाली असून, भविष्यातही असे उपक्रम राबविण्याचे आश्वासन आयोजकांनी दिले.