74161

सुप्रिया देसाई ‘मिस इंडिया फॅब्युलस’

पाल पुनर्वसनची कन्या; मुंबई येथील कार्यक्रमात किताब प्राप्त

सकाळ वृत्तसेवा
दोडामार्ग, ता. ३० : पाल पुनर्वसन गावची कन्या सुप्रिया देसाई ‘मिस्टर, मिस अँड मिसेस रॉयल ग्लोबल किंग अँड क्वीन’च्या सीझन ५ मध्ये विशेष क्विन्स श्रेणीतील ‘मिस इंडिया फॅब्युलस २०२५’ची विजेती ठरली. तिच्या यशाबद्दल सर्वस्तरांतून अभिनंदन होत आहे.
डॉ. नीलम पराडिया यांनी ‘द टोपाझ इव्हेंट्स’च्या सहकार्याने व पती कल्पेश पराडिया यांच्या पाठिंब्याने ‘मिस्टर मिस अँड मिसेस रॉयल ग्लोबल किंग अँड क्वीन २०२५’चे रॉयल ग्लोबल अचीव्हर अवॉर्ड्स सीझन ५ चे आयोजन केले होते. यावर्षी ‘रॉयल ग्लोबल कपल’चा शुभारंभ देखील झाला. हा सोहळा २१ व २२ जूनला मुंबई येथील क्लब एमराल्ड येथे पार पडला.
यात भारतासह, यूके, सिंगापूर, यूएई, श्रीलंका आणि नेपाळमधील स्पर्धक सहभागी झाले. पहिल्या दिवशी स्वागत समारंभानंतर प्रतिष्ठित आंतरराष्ट्रीय प्रशिक्षकाच्या नेतृत्वाखाली सघन प्रशिक्षण सत्रे झाली. यात मौल्यवान कौशल्ये आणि अंतर्दृष्टी दिली. निवडीसाठी बहुप्रतीक्षित परिचय फेरी, प्रतिभा फेरी आणि प्रश्नोत्तरांचा समावेश होता. बॉलिवूड अभिनेत्री एलेना तुतेजा, सुपरमॉडेल क्रमिक यादव, बॉलीवूड अभिनेता अली खान, ताहीर कमाल खान, कबीरसिंग राजपूत, डॉ. अर्चना चौधरी, श्याजमी हुसेन (सिंगापूर), अर्पिता मिश्रा आणि प्रियंका राजपूत यांनी ज्युरी म्हणून काम पाहिले.
सुप्रिया देसाई ही पदवीधर असून आंतरराष्ट्रीय मॉडेल आहे. डान्सिंग, ट्रॅव्हलिंग, मॉडेलिंग हे तिचे छंद आहेत. लहानपणापासूनच रॅम्प वॉक आणि फोटोशूट करणे हे तिचे स्वप्न आहे. दिल्ली येथे २०२२ मध्ये ती मॉडेलिंगमध्ये प्रथम उपविजेता म्हणून, २०२२ मध्ये नवी मुंबई येथे भारत शक्तिमान पुरस्कार तिने पटकावला होता. देश आणि आंतरराष्ट्रीय स्तरावरील अनेक कार्यक्रमांमध्ये ती सहभागी झाली आहे. तिला मॉडेलिंग क्षेत्रात तीन वर्षांचा अनुभव असून या क्षेत्रातच तिला करिअर घडवायचे आहे. वडील नोकरीनिमित गोव्यात आल्याने सध्या होंडा-सत्तरी येथे वास्तव्यास आहे. आपल्या यशाचे श्रेय ती पालकांना देते.