rat30p16.jpg-
74156
शेखर निकम

पालकमंत्र्यांना त्यांचा पक्ष वाढवण्याचा अधिकार
शेखर निकमः चिपळूणात आले तर त्यांचे स्वागतच करू
सकाळ वृत्तसेवा
चिपळूण, ता. ३० ः पालकमंत्री दर शनिवारी चिपळूणमध्ये येणार असतील तर त्यांचे स्वागत आहे. ते आले तर आमची छोटी-मोठी कामे सोडवण्यास मदत होईल, असे राष्ट्रवादी कॉंग्रेसचे आमदार शेखर निकम यांनी सांगितले. तसेच पालकमंत्र्यांना त्यांचा पक्ष वाढवण्याचा अधिकार आहे. माझा जीव आमदारकीत अडकलेला नाही. त्यामुळे महायुतीत कोणीही आले तरी त्यांचे स्वागतच आहे, अशी प्रतिक्रिया पालकमंत्री आणि प्रशांत यादवांच्या भेटीवर आमदार निकम यांनी दिली.
मुंबई-गोवा राष्ट्रीय महामार्गाची पाहणी करण्यासाठी मंत्री सामंत रविवारी (ता. २९) चिपळूण येथे आले होते. त्या वेळी त्यांनी पत्रकार परिषद घेऊन रत्नागिरी विधानसभा मतदार संघात राष्ट्रवादीकडून सुरू असलेल्या कुरघोडीबद्दल नाराजी व्यक्त केली. आमच्या मतदार संघात येऊन कोणी ढवळाढवळ करणार असेल तर अजिबात खपवून घेतले जाणार नाही, असा इशाराही सामंत यांनी उपमुख्यमंत्री अजित पवार यांचे नाव न घेता त्यांच्या राष्ट्रवादीला लगावला. तसेच आमदार शेखर निकम यांचे प्रतिस्पर्धी प्रशांत यादव यांनी पक्षात यावे, अशी सादही घातली.
या पार्श्वभूमीवर आमदार निकम यांच्याशी संपर्क साधला असता ते म्हणाले, अजित यशवंतराव यांच्या बोलण्याची दखल पालकमंत्री घेतील असे मला वाटले नव्हते. त्यांचे आणि माझे या विषयावर अजून बोलणे झालेले नाही. आमचे दोघांचे संबंध राजकारणापलीकडचे आहेत. प्रत्येकाला पक्ष वाढवायचा अधिकार आहे. महायुतीमध्ये कोणाला घ्यायचे आणि कोणाला घ्यायचे नाही, हा अधिकार वरिष्ठ नेत्यांचा आहे. कोण काय बोलला असेल तर त्यावर वरिष्ठ पातळीवर चर्चा होईल. नेते एकत्र बसून निर्णय घेतील. माझ्यासमोर साडेचार वर्षे आहेत. या कालावधीत चिपळूण मतदार संघाचा विकास करणे, लोकांची सेवा करणे हेच माझे उद्दिष्ट आहे. माझ्यासाठी आमदारकी महत्त्वाची नाही. महायुतीचा जो उमेदवार असेल अन् उपमुख्यमंत्री अजित पवार आदेश देतील त्या उमेदवाराला निवडून आणण्याचे काम मी करेन. आमदारकी माझ्यासाठी खूप छोटी गोष्ट आहे.

चौकट
प्रत्येकाला नशिबानुसारच मिळते
मी निवडणुका डोळ्यासमोर ठेवून राजकारण करत नाही. महायुतीमध्ये कोणी आला म्हणून माझी किंमत किंवा माझे वजन कमी होणार नाही. प्रत्येकाला आपल्या नशिबानुसार मिळेल. महायुतीने मला डावलून नवीन उमेदवार दिला तर त्याला निवडून आणण्याचा प्रामाणिक प्रयत्न मी करेन, असेही आमदार निकम यांनी सांगितले.