74171

वृक्ष संवर्धनाचे प्रयत्न कौतुकास्पद

मीनाक्षी देसाई ः त्रिंबक ग्रामपंचायतीतर्फे वृक्षारोपण मोहीम

सकाळ वृत्तसेवा
आचरा, ता. ३० ः वृक्ष संवर्धन ही काळाची गरज आहे आणि त्यासाठी त्रिंबक गावातर्फे सुरू असलेले प्रयत्न कौतुकास्पद आहेत, असे प्रतिपादन आचरा पोलिस ठाण्याच्या सहाय्यक उपनिरीक्षक मीनाक्षी देसाई यांनी त्रिंबक येथे केले.
ग्रामपंचायत त्रिंबक आणि जागृत उन्नती मंडळाच्या संयुक्त विद्यमाने सापळा त्रिंबक येथे आयोजित वृक्षारोपण कार्यक्रमावेळी त्या बोलत होत्या. यावेळी सरपंच किशोर त्रिंबककर, जागृत उन्नती मंडळ मुंबई अध्यक्ष दत्ता पवार, कार्याध्यक्ष चेतन साटम, सचिव अरविंद कदम, खजिनदार संतोष त्रिंबककर, सदस्य अनिल कदम, सुनील जाधव, ग्रामीण शाखेचे बाळा बागवे, उदय मेहेंदळे, पूजा सुतार, विलास त्रिंबककर, संतोष घाडीगावकर, सीताराम सकपाळ, सुचिता घाडीगावकर, प्रदीप दामले तसेच सुरेंद्र सकपाळ, आशिष बागवे, अशोक बागवे, श्रीकांत बागवे, प्रवीण घाडीगावकर आदींसह बहुसंख्य ग्रामस्थ उपस्थित होते.
दोनशे झाडे लावून त्रिंबक गाव हरित करण्याच्या उद्देशाने या कार्यक्रमाचे नियोजन करण्यात आले होते. यानिमित्ताने जनता विद्या मंदिर येथे आयोजित कार्यक्रमात दहावी उत्तीर्ण झालेल्या पहिल्या पाच मुलांचा सत्कार करण्यात आला. कार्यक्रमाचे प्रास्ताविक उदय मेहेंदळे यांनी प्रास्ताविक करताना मंडळाच्या स्थापनेचा उद्देश स्पष्ट केला. मंडळाचे अध्यक्ष पवार यांनी, त्रिंबक गावाच्या एकूण विकासाकरिता मंडळ सदैव प्रयत्नशील आहे. भविष्यात अनेक उपक्रम राबविण्यात येतील, अशी ग्वाही दिली. यावेळी जयश्री कदम यांना घर दुरुस्तीसाठी मंडळाकडून आर्थिक मदत देण्यात आली. हा कार्यक्रम यशस्वी करण्याकरिता ग्रामपंचायत सदस्य, कर्मचारी, सुरेंद्र सकपाळ, बाबू सकपाळ, प्रवीण घाडीगावकर, छाया साटम, संतोषी सावंत यांनी विशेष प्रयत्न केले.