74177

गव्यांच्या मुक्त संचाराने
आरे परिसरामध्ये दहशत

सकाळ वृत्तसेवा
देवगड, ता. ३० : तालुक्यातील आरे परिसरात भर दिवसा गवे दिसल्याने स्थानिकांमध्ये काहीशी अस्वस्थता पसरली आहे. भर दिवसा गवे दिसू लागल्याने परिसरात गव्यांचे वास्तव्य असल्याचे पुन्हा एकदा अधोरेखित झाले आहे. गव्यांचा वन विभागाने तातडीने बंदोबस्त करण्याची स्थानिकांची मागणी आहे.
सध्या शेतीचा हंगाम सुरू असल्याने शेती कामासाठी जाताना शेतकरी तसेच महिलांना असुरक्षित वाटत आहे. तालुक्यातील शिरगाव, साळशी, आरे परिसरात अनेकदा गाव्यांचे दर्शन घडले आहे. गव्यांमुळे अपघातही घडले होते. आंबा बागांमधूनही दिवसा गवे दृष्टीस पडले होते. यामुळे शेतीचे नुकसान होत असल्याची स्थानिकांची तक्रार असते. आता आरे भागात भर दिवसा गवे दिसल्याने स्थानिकांमध्ये भीतीचे वातावरण निर्माण झाले होते. तेथील वस्तीजवळ गवे दिसत असल्याची स्थानिकांची माहिती आहे. त्यामुळे शाळेत जाणाऱ्या लहान मुलांच्या सुरक्षेसह शेती कामासाठी जाणारे शेतकरी, महिलांमध्ये चिंतेचे वातावरण पसरले आहे. सध्या भातशेतीचा हंगाम सुरू आहे. अशावेळी गव्यांकडून शेतीचे नुकसान होण्याची भीती व्यक्त करण्यात येत आहे. यासाठी वन विभागाने गव्यांचा तातडीने बंदोबस्त करावा, अशी मागणी होत आहे.