74187

आदर्श शिक्षकाची आठवण समाजात कायम

नंदकुमार घाटे ः जामसंडेत विनायक ठाकूर यांचा सत्कार

सकाळ वृत्तसेवा
देवगड, ता. ३० ः जामसंडे येथील श्री. मो. गोगटे माध्यमिक विद्यामंदिरमधील शिक्षक विनायक ठाकूर ३२ वर्षांच्या दीर्घ सेवेनंतर निवृत्त झाले. यानिमित्ताने संस्था व शाळा यांच्या वतीने शाल, श्रीफळ आणि भेटवस्तू देऊन त्यांचा सत्कार करण्यात आला. कार्यक्रमाचे निमित्त साधून ज्येष्ठ उद्योगपती नंदकुमार घाटे यांनीही श्री. ठाकूर यांचा सन्मान केला. चांगल्या शिक्षकाची समाजाला नेहमीच आठवण असते, असे सांगून विद्यार्थ्यांनी मोबाईलचा अतिरेक टाळावा, असे आवाहन श्री. घाटे यांनी यावेळी केले.
हायस्कूमधील शिक्षक श्री. ठाकूर निवृत्त झाले. त्यामुळे त्यांचा संस्था, शाळा यांच्यावतीने निरोप समारंभ करण्यात आला. श्री. ठाकूर १९९३ मध्ये ते शाळेत रुजू झाले होते. सुमारे ३२ वर्षे त्यांनी अध्यापन सेवा केली. यानिमित्त त्यांचा सन्मान करण्यात आला. मंचावर प्रमुख पाहुणे ज्येष्ठ उद्योगपती नंदकुमार घाटे, संस्थाध्यक्ष अ‍ॅड. अजित गोगटे, कार्यवाह प्रवीण जोग, सत्कारमूर्ती विनायक ठाकूर, गौरी ठाकूर, प्रकाश गोगटे, महेश रानडे, नम्रता तावडे, सुधीर आचरेकर, माजी कार्यवाह संतोष कुळकर्णी, मुख्याध्यापक सुनील जाधव, राजेंद्र लोवलेकर, शरद शिंदे यांच्यासह अन्य उपस्थित होते. यावेळी संस्था, शाळा, प्राथमिक विभाग तसेच शिक्षकेतर कर्मचारी यांच्या वतीने श्री. ठाकूर यांचा शाल, श्रीफळ आणि भेटवस्तू देऊन सत्कार केला. तसेच श्री. घाटे यांनीही श्री. ठाकूर यांच्यासह मुख्याध्यापक सुनील जाधव, सुधीर आचरेकर, प्रदीप घाडी, मृत्यूंजय मुणगेकर यांचा सत्कार केला.
श्री. घाटे यांनी, संस्था आपली आहे ही भावना कायम मनात जपली पाहिजे. चांगल्या शिक्षकाची समाजाला नेहमीच आठवण असते. विद्यार्थ्यांनी शैक्षणिक प्रगती साधताना मोबाईलचा अतिरेक टाळावा, असे सांगून शाळा जडणघडणीचा आढावा घेतला. श्री. ठाकूर यांनी, विद्यार्थ्यांमध्ये स्वयंशिस्त महत्त्वाची आहे. त्यामुळे जीवनाचा प्रवास सुखाचा होतो. विद्यार्थी शाळेचा केंद्रबिंदू असून विद्यार्थ्यांमुळे शाळेत चैतन्य असते. विद्यार्थ्यांनी चांगला अभ्यास करून यशस्वी व्हावे, असे आवाहन केले.
अजित गोगटे यांनी, निवृत्तीनंतर रिकामे न राहता कार्यरत राहण्याचे आवाहन केले. शाळेतर्फे संजीवनी जाधव, विनायक जाधव यांनी, प्राथमिक विभागातर्फे चेतन पुजारे यांनी तर विद्यार्थ्यांमधून आर्या मणचेकर व दुर्गा भिडे यांनी तसेच उपस्थितांमधून संजय गोगटे, ऋत्विक धुरी, प्रकाश गोगटे यांनी मनोगत व्यक्त केले. कार्यक्रमाला माजी मुख्याध्यापक माधव खाडीलकर, विजयकुमार हिरवे, सखाराम भागवत, मिलिंद ठाकूर यांच्यासह अन्य उपस्थित होते. प्रास्ताविकात सुनील जाधव यांनी श्री. ठाकूर यांच्या कार्यकाळाचा धावता आढावा घेऊन कवितेतून भावी वाटचालीसाठी शुभेच्छा दिल्या. सूत्रसंचालन प्रज्ञा चव्हाण यांनी केले. आभार संजय पांचाळ यांनी मानले.