76194

पंढरपूर आषाढी पायी वारी
तारामुंबरी मंदिरात परतली
देवगड, ता. ८ ः येथील तारामुंबरीतील श्री विठ्ठल रखुमाई मंदिर यांच्यावतीने आषाढी एकादशी निमित्ताने पंढरपूरला गेलेली पायी वारी येथे परतल्यानंतर त्यांचे उत्साहात स्वागत करण्यात आले.
पायीवारीच्या आगमनानंतर मंदिरात हरिनामाचा गजर झाला. यावेळी नामदेव तळवडकर यांच्यासह अन्य मान्यवरांचा सन्मान करण्यात आला. दुपारी महाप्रसाद वाटप करून उत्सवाची सांगता करण्यात आली. येथून १९ जूनला पंढरपूरच्या दिशेने पायी वारी गेली होती. सासवड येथे वारी पोहोचल्यानंतर श्री संत सोपान काका आषाढी पायीवारी पालखी सोहळ्यात ही मंडळी सहभागी झाली. तळवडकर यांच्या मार्गदर्शनाखाली वारीचा प्रवास झाला. यामध्ये वारकरी मंडळी उत्साहाने सहभागी झाली होती. आज सकाळी वारीचे पुन्हा येथे आगमन झाले. त्यांचे उत्साही वातावरणात स्वागत करण्यात आले. मंदिरात टाळ-मृदंगाचा गजर करून वारीची सांगता करण्यात आली. तळवडकर यांचा सन्मान करण्यात आला. यावेळी तारामुंबरी श्री विठ्ठल रखुमाई मंदिर ट्रस्ट अध्यक्ष सूर्यकांत जोशी, देविदास परब, मिलिंद कुबल, ज्ञानेश्‍वर खवळे यांच्यासह अन्य उपस्थित होते.