आरवली बीएसएनएल
टॉवर नादुरुस्त
संगमेश्वर ः संगमेश्वर तालुक्यातील आरवली येथील भारत संचार निगमचा मोबाईल टॉवर गेले १५ दिवस नादुरुस्त आहे. त्यामुळे आरवली, पांचाबेसह आजुबाजूच्या अनेक गावातील बीएसएनएल ग्राहकांची मोबाईल सेवा पूर्ण बंद झाली आहे. मोबाईल याचा फटका केवळ सामान्य नागरिकांनाच नव्हे तर व्यापारी, शालेय विद्यार्थी आणि ज्येष्ठ नागरिकांनाही बसत आहे. विशेषतः डिजिटल व्यवहार, मोबाईल बँकिंग, आरोग्यविषयक सेवा, ऑनलाईन शिक्षण यावर मोठा परिणाम झाला आहे. स्थानिक ग्रामस्थांनी बीएसएनएलच्या अधिकाऱ्यांकडे वारंवार तक्रारी केल्या असूनही दुरुस्तीच्या कामाला कोणतीही गती मिळत नसल्याचा आरोप केला जात आहे. यामुळे नाराज ग्राहकांनी आता तीव्र आंदोलनाचा इशारा दिला आहे.

पेजे महाविद्यालयात
सीपीआर जागृती शिबिर
पावस ः रत्नागिरी तालुक्यातील शिवार आंबेरे येथे इंग्लिश स्कूल, श्रमिक विद्यालय, लोकनेते शामराव पेजे महाविद्यालयाच्या राष्ट्रीय सेवा योजना विभागांतर्गत सीपीआर अवअरनेस कॅम्पचे आयोजन पावस प्राथमिक आरोग्यकेंद्रामार्फत करण्यात आले होते. यासाठी पावस प्राथमिक आरोग्यकेंद्राचे वैद्यकीय अधिकारी डॉ. अतुल पाटील, डॉ. राठोड, डॉ. जसपाल राजपूत, एस. व्ही. जाधव, नीलेश गुळेकर, मुख्याध्यापक मधुकर थूळ आदी उपस्थित होते. डॉ. राठोड यांनी सीपीआर कार्यप्रणाली करताना कोणती दक्षता घेतली पाहिजे, कोणत्या गोष्टी टाळाव्यात या संदर्भात विशेष मार्गदर्शन त्यांनी केले.

मार्लेश्वर पर्यटनक्षेत्र
नेटवर्कच्या प्रतिक्षेत
साडवली ः देवरूखजवळील मार्लेश्वर येथे दर्शन घेण्यासाठी दररोज हजारो भाविक हजेरी लावतात; परंतु या परिसरात मोबाईल नेटवर्क नसल्याने स्थानिक उद्योजकांसह पर्यटकांचीही मोठी गैरसोय होत आहे. या सर्वाचा विचार करून मारळ ग्रामपंचायत आणि इथल्या स्थानिकांनी गावात मोबाईल नेटवर्क येण्यासाठी बीएसएनएल कंपनीकडे पाठपुरावा सुरू केला. त्यानंतर गावात टॉवर उभा राहिला; परंतु वीजजोडणीचे कारण देत पुढील काम रखडले. अनेकवेळा पाठपुरावा केल्यानंतर वीजजोडणी झाली. मीटर बसला; परंतु आता अखेरच्या टप्प्यातील नेटवर्कसाठी लागणारे साहित्य नसल्याने पुढील काम रखडले आहे. याकडे लोकप्रतिनिधींनीही दुर्लक्ष केले आहे.