77082

देऊळवाडा-आडवण येथील
शवदाहिनीची दुरुस्ती करा

यतीन खोत ः मालवण पालिकेस निवेदन

सकाळ वृत्तसेवा
मालवण, ता. १२ : शहरातील देऊळवाडा-आडवण येथील नगरपरिषदेच्या मालकीच्या वैकुंठधाममध्ये चुकीच्या पद्धतीने शवदाहिनी उभारल्याने नागरिकांना अनेक समस्यांचा सामना करावा लागत आहे. त्यामुळे या शवदाहिनीच्या दुरुस्तीसह आणखी एक शवदाहिनी उभारावी, अशा मागणीचे निवेदन शुक्रवारी (ता. ११) पालिकेचे माजी बांधकाम सभापती यतीन खोत यांच्यासह स्थानिक नागरिकांनी पालिका प्रशासनाला सादर केले. देऊळवाडा-आडवण येथील स्मशानभूमीत उभारलेली शवदाहिनी चुकीच्या पद्धतीने उभारली आहे. या शवदाहिनीवर मृतदेह अंत्यविधीसाठी ठेवल्यानंतर जळताना तो खाली पडत असल्याचे प्रकार घडले आहेत. अशा प्रकारामुळे नागरिकांच्या भावना दुखावल्या जात आहेत. या स्मशानभूमीतील या समस्येबाबत स्थानिक नागरिकांनी यतीन खोत यांचे लक्ष वेधले. याचे गांभीर्य लक्षात घेत खोत यांनी स्मशानभूमीस भेट देऊन पाहणी केली. यावेळी शवदाहिनी चुकीच्या पद्धतीने उभारल्याचे दिसून आले. त्यामुळे खोत यांनी पालिका प्रशासनाकडे दुरुस्ती करण्याची सूचना केली आहे. नागरिकांची होणारी गैरसोय दूर करण्यासाठी या स्मशानभूमीतील शवदाहिनीची तत्काळ दुरुस्ती करावी. या ठिकाणी पूर्वी दोन दाहिन्या होत्या. त्यामुळे आणखी एक शवदाहिनी उभारण्यात यावी, अशी मागणी केली आहे. यावेळी बाबू कांदळकर, हेमंत कांदळकर, बाबू हडकर, पप्या नाईक, दीपक कामतेकर, नितीन तोडणकर, बाळा आचरेकर आदी उपस्थित होते.