swt212.jpg
78933
सावंतवाडीः पंचम खेमराज महाविद्यालयातर्फे डॉ. प्रतीक्षा सावंत यांचा सत्कार करण्यात आला.

प्रा. प्रतीक्षा सावंतांचा निवृत्तीपर सत्कार
सावंतवाडीतील सोहळाः पंचम खेमराज महाविद्यालयाचा पुढाकार
सकाळ वृत्तसेवा
सावंतवाडी, ता. २१ः सिंधुदुर्ग जिल्हा शिक्षण प्रसारक मंडळ सावंतवाडी संचलित श्री पंचम खेमराज महाविद्यालयाच्या प्राणीशास्त्र विभागाच्या प्रमुख डॉ. प्रतीक्षा सावंत नियत वयोमानानुसार सेवानिवृत्त झाल्या. यानिमित्त त्यांचा सिंधुदुर्ग जिल्हा शिक्षण प्रसारक मंडळाचे कार्यकारिणी सदस्य जयप्रकाश सावंत, संस्थेचे सहसंचालक अॅड. शामराव सावंत यांच्या हस्ते शाल, श्रीफळ, पुष्पगुच्छ व भेटवस्तू देऊन सत्कार करण्यात आला.
याप्रसंगी व्यासपीठावर महाविद्यालयाचे प्राचार्य डॉ. डी. एल. भारमल, सावंतवाडी पंचायत समिती माजी सभापती भगवान देसाई, प्रा. सतीश बागवे, मनोहर देसाई (डेगवे), बांधकाम व्यावसायिक संजय सावंत, अॅड. प्रदीप सावंत, प्राध्यापक वर्ग, शिक्षकेतर कर्मचारी व विद्यार्थी मोठ्या संख्येने उपस्थित होते. कार्यक्रमाचे प्रास्ताविक प्राणिशास्त्र विभागप्रमुख डॉ. जी. एस. मर्गज यांनी केले. डॉ. प्रतीक्षा सावंत यांनी गेली ३५ वर्षे महाविद्यालयामध्ये सेवा दिली. त्या मनमिळाऊ व इतरांसाठी प्रेरणादायी होत्या, असे ते म्हणाले.
हिंदी विभागाच्या प्रा. कविता तळेकर, वाणिज्य विभागाच्या प्रा. डॉ. सुनयना जाधव, प्रा. एम. ए. ठाकूर, प्राणीशास्त्र विभागाचे ज्ञानेश्वर तळकटकर, इंग्रजी विभागाचे प्रा. बी. एन. हिरामणी, प्राणीशास्त्र माजी प्राध्यापक एस. एच. महापुरे, वनस्पतीशास्त्राचे विभागप्रमुख डॉ. यू. एल. देठे, रसायनशास्त्र प्रा. दत्तप्रसाद मळीक, प्राणीशास्त्राचे ज्ञानेश्वर तळकटकर, पियुष सावंत, समिता सावंत, प्रीतम गिरीष, समीक्षा भानुषाली, स्वाती सावंत, मृणाल देसाई यांनी मनोगत व्यक्त केले. प्रा. भारमल यांनी डॉ. सावंत यानी प्राणीशास्त्र विभागामध्ये सहकारी म्हणून उत्तम काम केले, असे सांगितले. भगवान देसाई यांनी डॉ. सावंत यांच्या कार्याचे कौतुक केले. कार्यकारी सदस्य जयप्रकाश सावंत यांनी शुभेच्छा दिल्या. अॅड. सावंत यांनी त्यांच्या निवृत्तीपर भाषणामध्ये आठवणींना उजाळा दिला. सूत्रसंचालन डॉ. जी. एस. मर्गज यांनी केले. आभार प्रा. तळेकर यांनी मानले.