swt२५४.jpg
79865
गोवेरीः येथे आयोजित कार्यक्रमात गुणवंत विद्यार्थीनाचा गौरव करताना सरपंच मीरा गावडे.

गोवेरीत गुणवंत विद्यार्थ्यांचा गौरव, ग्रंथ प्रदर्शन
ज्ञानदीप वाचनालयाचा पुढाकार; विविध मान्यवरांची उपस्थिती
सकाळ वृत्तसेवा
कुडाळ, ता. २५ः गोवेरी येथील ज्ञानदीप वाचनालय व ग्रंथ संग्रहालयाच्या वतीने दहावी, बारावीतील गुणवंत विद्यार्थ्यांचा गौरव आणि ग्रंथ प्रदर्शनाचे आयोजन केले होते. या कार्यक्रमाला उत्स्फूर्त प्रतिसाद लाभला. सरपंच स्वरा गावडे यांच्या अध्यक्षतेखाली संकल्पसिद्धी सभागृहात हा कार्यक्रम पार पडला.
कार्यक्रमाचे उद्घाटन तेंडोली क्रमांक १ च्या शिक्षिका मीरा गावडे यांच्या हस्ते झाले. यावेळी व्यासपीठावर अ‍ॅड. मंदार मस्के, गोवेरी तलाठी सजा अनघा राणे, गोवेरी शाळेचे शिक्षक अमोल गोसावी, वाचनालयाचे अध्यक्ष सतिश गावडे, मांडकुली शाळेचे शिक्षक महेश गावडे, ग्रामपंचायत सदस्य आनंदी गावडे, उदय भगत, तंटामुक्ती समिती अध्यक्ष सूर्यकांत गावडे, सत्पुरुष कला क्रीडा मंडळाचे अध्यक्ष प्रकाश गावडे, माड्याचीवाडी सोसायटी अध्यक्ष एम. बी. गावडे, दिगंबर गोवेरकर, उमेश गावडे आणि ग्रंथपाल धोंडी गावडे आदी उपस्थित होते. यावेळी गोवेरी गावातील दहावी व बारावीत उत्तीर्ण ३४ विद्यार्थ्यांचा सत्कार करण्यात आला.
सत्कारासाठी सागाची रोपे शशिकांत मुळीक यांच्याकडून मोफत देण्यात आली. त्याचबरोबर प्रत्येकी प्रथम तीन क्रमांकांना एकेक चरित्र पुस्तक बक्षीस स्वरुपात देण्यात आले. यावेळी आयोजित ग्रंथ प्रदर्शनाचे उद्घाटन अ‍ॅड. मस्के यांच्या हस्ते करण्यात आले.
ग्रंथ प्रदर्शनामध्ये नवीन विषयांवरील अद्ययावत पुस्तके तसेच इतरही अनेक विषयांवरील अशी एकूण ८०० पुस्तके ठेवली होती. अ‍ॅड. मस्के यांनी कला, वाणिज्य आणि विज्ञान शाखांमधून विद्यार्थ्यांना पुढे कोणकोणत्या संधी आहेत? यावर मार्गदर्शन केले तसेच यूपीएससी, एमपीएससीसारख्या स्पर्धा परीक्षांना सामोरे जाण्यासाठी विद्यार्थ्यांमध्ये जागृती निर्माण केली. तलाठी राणे यांनी तलाठी भरती, पोस्ट ऑफिस भरती, विविध सरकारी कार्यालयांतील भरती यांसारख्या परीक्षांची तयारी सुरुवातीपासून कशी करावी? याबाबत मार्गदर्शन केले. सौ. गावडे यांनी विद्यार्थ्यांना त्यांच्या यशामधील त्यांचे आई-वडील आणि गुरुजनांचे महत्त्व व त्यांच्या ऋणांची विस्मृती कधीही होऊ देऊ नये याबाबत मार्गदर्शन केले तसेच ग्रंथालयाद्वारे वैविध्यपूर्ण साहित्याचा उपयोग मुलांनी आपल्या सर्वांगीण विकासासाठी करून घ्यावा असे आवाहन केले. श्री. गोसावी यांनी यशस्वी जीवनासाठी कठोर आणि सातत्यपूर्ण परिश्रमांना पर्याय नाही, असे सांगितले.
स्वरा गावडे यांनी व विद्यार्थ्यांना त्यांच्या पुढील वाटचालीसाठी शुभेच्छा दिल्या. सूत्रसंचालन महेश गावडे, प्रास्ताविक सतिश गावडे यांनी केले. आभार प्रकाश गावडे यांनी मानले. कार्यक्रम यशस्वीतेसाठी ग्रंथपाल धोंडी गावडे व सर्व कर्मचारी आणि गावातील कार्यकर्त्यांनी मेहनत घेतली.