सैनिकांसाठी ४२०० विद्यार्थी बनवणार राखी
परशुराम एज्युकेशन सोसायटी; ‘माझा देश, मी देशाचा’ उपक्रम
सकाळ वृत्तसेवा
चिपळूण, ता. २५ ः विद्यार्थ्यांमध्ये राष्ट्रभक्ती, कृतज्ञता आणि सामाजिक बांधिलकी निर्माण व्हावी, या उद्देशाने परशुराम एज्युकेशन सोसायटीच्या संकुलात ‘माझा देश, मी देशाचा–एक राखी देशासाठी’ हा विशेष उपक्रम २८ जुलैला आयोजित केला आहे. यामध्ये सुमारे ४२०० विद्यार्थी स्वतःहून तयार केलेली राखी सैनिकांना पाठवणार आहेत.
चिपळूण संकुलात होणाऱ्या या उपक्रमाद्वारे देशाच्या सीमेवर कार्यरत असलेल्या सैनिकांप्रति कृतज्ञता व्यक्त करण्यात येणार आहे. शाळेतील ज्या विद्यार्थ्यांचे पालक भारतीय लष्करात आहेत त्यांना केंद्रस्थानी ठेवून ही संकल्पना पुढे आणली गेली आहे. त्यामुळे ‘माझ्या मित्राचे वडील देशाच्या सीमेवर रक्षण करत आहेत,’ याची जाणीव विद्यार्थ्यांच्या मनात ठसली जाणार आहे. या कार्यक्रमाची सुरुवात सकाळी १०.३० वाजता शाळेच्या प्रवेशद्वारात सरस्वती पूजन आणि मातृभूमी पूजनाने होईल. या वेळी सैनिकांचे कुटुंबीय, माजी सैनिक, पालक, पालक प्रतिनिधी उपस्थित राहणार आहेत. त्यानंतर युनायटेड इंग्लिश स्कूल आणि सुरेश दामोदर गद्रे इंग्लिश मीडियम स्कूल येथील आठवी आणि नववीचे विद्यार्थी फेरीसाठी रवाना होतील. त्यामध्ये सुमारे ६०० विद्यार्थी सहभागी होणार आहेत. सकाळी ११.३० वाजता ही विद्यार्थी फेरी चिपळूण पोस्ट कार्यालयात पोहोचेल. तिथे विभागीय व तालुकास्तरीय प्रशासकीय अधिकाऱ्यांच्या हस्ते राख्यांची पाकिटे पोस्ट अधिकाऱ्यांकडे सुपूर्द करण्यात येतील. त्यानंतर चिपळूण-कऱ्हाडमार्गे फेरी परत शाळेत येईल. शाळेच्या प्रवेशद्वारावर गद्रे इंग्लिश स्कूलचे विद्यार्थी सर्वांचे स्वागत करतील. या दिवशी संकुलातील उर्वरित सर्व विद्यार्थ्यांकडूनही रक्षाबंधन साजरे करण्यात येणार आहे.
----
कोट
परशुराम एज्युकेशन सोसायटीचा हा उपक्रम प्रतिवर्षी नियमितपणे साजरा व्हावा आणि शाळेच्या शैक्षणिक संस्कृतीचा एक महत्त्वाचा भाग बनावा, हा यामागचा हेतू आहे.
- विभाकर वाचासिद्ध, मुख्याध्यापक