छत्रीवर नावे लिहून देणारे बाळकृष्ण काष्टे
संगमेश्वर बाजारपेठेत वीस वर्षे जपताहेत कला
सकाळ वृत्तसेवा
संगमेश्वर, ता. २७ ः पावसाळा आला की सर्वांच्या आठवणीत येते छत्रीची. सध्या बाजारपेठेत रंगीबेरंगी छत्र्या विक्रीसाठी पहायला मिळतात. छत्री घेतली की ती हरवण्याची भिती अनेकांना असते. अशा वेळी त्या छत्रीवर नाव असेल तर किमान ओळख पटवणे शक्य होते. त्यासाठी संगमेश्वर बाजारपेठेत बाळकृष्ण काष्टे यांनी छत्र्यांवर नावे घालून देण्यास सुरूवात केली आहे. त्यांच्याकडे संगमेश्वरवासीयांची गर्दी होत असते.
माभळे संगमेश्वर येथील बाळकृष्ण काष्टे हे शेतकरी कुटुंबातील आहेत. त्यांनी संगमेश्वर बाजारपेठेत पोल्ट्री व्यवसायातून उदरनिर्वाहाला सुरुवात केली. त्याबरोबरच कलेची आवड जोपासताना त्यांनी लहानपणापासूनच छत्र्यांवर ऑईल पेंटने नाव लिहिण्यास सुरुवात केली. सुरुवातीला केवळ पाच रुपयांत ते नाव लिहून देतात. हा उपक्रम त्यांनी गेली २० वर्षे अविरतपणे चालू ठेवलेला आहे. ग्राहकांच्या नावाबरोबरच छत्रीवर आकर्षक नक्षीही ते काढतात. जेणेकरून छत्री आणखी उठावदार आणि ओळखण्यास सुलभ होते. त्यांच्या या उपक्रमामुळे संगमेश्वर बाजारपेठेत हरवलेली छत्री अनेकदा मूळ मालकाकडे परत येते. दिवसाला १५ ते २० छत्र्यांवर नाव टाकणारे काष्टे हे पावसाळ्यात जवळपास १ हजार छत्र्यांवर नाव लिहितात. विशेष म्हणजे, या उपक्रमातून मिळणारा काही भाग ते समाजकार्यासाठीही वापरतात. त्यांच्या या उपक्रमाचे कौतुक सर्वत्र होत आहे.