80287

रस्त्यावर चर, अपघाताचा धोका

दांडेली-पाडलोस मार्ग; युवा सेना आक्रमक

सकाळ वृत्तसेवा
बांदा, ता. २७ ः दांडेली-पाडलोस मार्गावर मेमध्ये दोन ठिकाणी करण्यात आलेल्या पाईप खोदाईच्या कामातील हलगर्जीपणामुळे सध्या रस्त्यावर मोठा चर पडून अपघाताचा धोका निर्माण झाला आहे. तात्पुरती करण्यात आलेली डागडुजी आता निष्प्रभ ठरली असून चर खचल्याने वाहनचालक आणि पादचाऱ्यांना मोठा त्रास सहन करावा लागत आहे. रस्त्याची तत्काळ दुरुस्ती करावी; अन्यथा आंदोलन छेडण्याचा इशारा युवासेना मळेवाड विभागप्रमुख समीर नाईक यांनी दिला आहे.
गेल्या मेमध्ये दांडेली-पाडलोस या रस्त्याच्या बाजूपट्टीचे काम हाती घेण्यात आले होते. त्यावेळी रस्त्याच्या मधोमध दोन ठिकाणी चर खणून त्यात पाईप टाकण्यात आले. त्यानंतर तात्पुरत्या स्वरुपात डागडुजी करण्यात आली. योग्यरित्या काम पूर्ण न केल्याने पादचारी व वाहनचालकांना रस्त्यावर चर पडला असून त्यामुळे पादचारी व वाहनचालकांना नाहक त्रास सहन करावा लागत आहे. अनेक वेळा वाहने चरात आदळून अपघातही झाले; मात्र प्रशासनाचे दुर्लक्ष होत असल्याचा आरोप ग्रामस्थांमधून होत आहे.
----
तातडीने दुरुस्तीची मागणी
पाईप टाकलेल्या ठिकाणची माती ढासळून खचल्याने रस्त्यावर धोकादायक चर तयार झाला आहे. या चरामुळे रात्रीच्या वेळी किंवा पावसात वाहनचालकांना विशेषतः दुचाकीस्वारांना अपघाताचा मोठा धोका निर्माण झाला आहे. स्थानिक नागरिकांनी या प्रकाराबाबत तीव्र नाराजी व्यक्त केली आहे. त्यामुळे प्रशासनाने या गंभीर समस्येकडे तत्काळ लक्ष देऊन कायमस्वरुपी दुरुस्ती करावी, अशी मागणी नाईक यांनी केली आहे.