80502

कुडाळातील स्पर्धकांचे
‘कराटे बेल्ट’मध्ये यश
ओरोस, ता. २८ः अकॅडमी ऑफ कराटे, सेल्फ डिफेंन्स अँड मार्शल आर्ट्सतर्फे कुडाळ येथे कराटे बेल्ट परीक्षा घेण्यात आली. यात कुडाळ येथील स्पर्धकांनी यश संपादन केले. या परीक्षेमध्ये समर्थ पेंडूरकर, आराध्य शेटकर, मिहीर धामापूरकर, सक्षम रणीत, देवांश चव्हाण, कुमार मानकर, पार्थ सामंत यांना येलो बेल्ट प्राप्त झाला. तर भार्गव वेंगुर्लेकर व लिया वेंगुर्लेकर यांना ऑरेंज बेल्ट प्राप्त झाला. विभा कोरगावकर, ओम बांबार्डेकर, दिव्या आगलावे व रित्वी परब यांना ब्ल्यू बेल्ट प्राप्त झाला. मंथन मठकर व माही मठकर यांना ग्रीन बेल्ट तर भाग्यश्री बांबार्डेकर हिला पर्पल बेल प्राप्त झाला. ही परीक्षा संस्थेचे मुख्य प्रशिक्षक लेफ्टनंट विवेक राणे यांच्या अध्यक्षतेखाली पार पडली. कराटे अकॅडमीचे प्रशिक्षक चित्राक्षा मूळये व सुरज काळे यांनी पर्यवेक्षक म्हणून काम पाहिले. यशस्वी विद्यार्थ्यांचे मराठा समाज कुडाळचे सरचिटणीस नंदू गावडे यांनी अभिनंदन केले.
---------------
80501

भाजप प्रदेशाध्यक्ष चव्हाणांनी
घेतली पंतप्रधान मोदींची भेट
कुडाळ, ता. २८ः भाजपचे महाराष्ट्र प्रदेशाध्यक्ष रविंद्र चव्हाण यांनी आज नवी दिल्ली येथे पंतप्रधान नरेंद्र मोदी यांची सदिच्छा भेट घेतली. या भेटीत महाराष्ट्र भाजपची संघटनात्मक घडामोडी, आगामी कार्यक्रमांचे नियोजन व पक्षवाढीची दिशा याबाबत सविस्तर माहिती श्री. चव्हाण यांनी पंतप्रधान मोदी यांना दिली. जानेवारी ते जून २०२५ या कालावधीत भाजपा महाराष्ट्र प्रदेश कार्यकारी अध्यक्ष म्हणून केलेल्या पक्षकार्याचा अहवाल यावेळी पंतप्रधान मोदी यांच्याकडे सुपूर्द केला.
या पक्षकार्य अहवालात महाराष्ट्रात बूथ पातळीवर सुरू असलेले संघटनकार्य, सदस्य नोंदणी मोहिम, पदाधिकाऱ्यांचे प्रशिक्षण, संपर्क अभियान आणि महिला-युवा आघाड्यांच्या उपक्रमांचा सविस्तर आढावा आहे. तसेच आगामी काळात महाराष्ट्रातील पक्ष संघटनेला बळकटी देण्यासंदर्भात मोदींकडून श्री. चव्हाण यांना मार्गदर्शन लाभले. पंतप्रधान मोदींनी श्री. चव्हाण यांचे अभिनंदन करत त्यांना पुढील वाटचालीसाठी शुभेच्छा दिल्या.