80795

परुळेतील शेतीत विद्यार्थ्यांचा
‘बळीराजासाठी एक दिवस’

जिल्हा परिषद शाळेचा उपक्रम

म्हापण, ता. २९ ः जिल्हा परिषद परुळे शाळा क्र. ३ च्या शिक्षकांनी मुलांसोबत ‘बळीराजासाठी एक दिवस’ या उपक्रमांतर्गत शाळेजवळ असलेल्या शेतात जाऊन शेती कामांचा आनंद लुटला. ‘बांधावरची शाळा’ उपक्रम मोठ्या उत्साहात राबविला.
यावेळी शिक्षकांनी व विद्यार्थ्यांनी नांगरणी, तरवा काढणी, भात लावणी आदी कामांचा प्रत्यक्ष अनुभव घेतला. जिल्हा परिषदच्या वतीने ‘बळीराजासाठी एक दिवस’ हा उपक्रम दरवर्षी जिल्ह्यातील सर्व शाळांमध्ये राबविण्यात येतो. विद्यार्थ्यांना बालवयापासून शेतकऱ्याबद्दल आदर व प्रेम निर्माण व्हावे, शेती विषयी माहिती मिळावी, यासाठी परुळे शाळेच्या विद्यार्थ्यांनी प्रत्यक्ष बांधावर जात शेतीचे धडे घेतले. यावेळी ‘धरतीची आम्ही लेकरं’ या गाण्यावर मुलांनी ठेका धरला. शेतीच्या चिखलात उतरत मातीशी नाळ जोडली गेली. यावेळी मुख्याध्यापक प्रविणा दाभोलकर, शिक्षक दत्तात्रय म्हैसकर, रवींद्र गोसावी, शालीक पाटील आदींसह विद्यार्थी उपस्थित होते.