एकांकिकेची प्राथमिक
फेरी रत्नागिरीत
रत्नागिरी, ता. ३० ः अखिल भारतीय मराठी नाट्य परिषदेच्या शंभराव्या नाट्यसंमेलनानिमित्त राज्यस्तरीय एकांकिका स्पर्धा आयोजित केली असून रत्नागिरी, सिंधुदुर्ग आणि रायगड जिल्ह्यासाठी रत्नागिरी येथे २३ व २४ ऑगस्टला प्राथमिक फेरी होणार आहे. अंतिम फेरी १५ ते १८ सप्टेंबर रोजी मुंबईत होईल. यावर्षी नाट्य परिषदेच्या शंभराव्या नाट्यसंमेलनानिमित्ताने राज्यातील विविध ठिकाणी बालनाट्य, नाट्यगीत गायनसारख्या विविध स्पर्धा घेण्यात आल्या. सर्व तरुण आणि हौशी रंगकर्मींना एकत्र आणण्यासाठी भव्य एकांकिका स्पर्धेचे आयोजन करण्यात आले आहे. सहभागासाठी १० ऑगस्टपर्यंत ऑनलाईन फॉर्म भरावयाचे आहेत. स्पर्धेचे समन्वयक म्हणून डॉ. आनंद आंबेकर आणि रंगकर्मी सुनील बेंडखळे काम पाहत असून अधिक माहितीसाठी त्यांच्याशी संपर्क साधण्याचे आवाहन केंद्रप्रमुख समीर इंदुलकर यांनी केले आहे. तसेच जास्तीत जास्त संस्था, महाविद्यालयातील विद्यार्थ्यांनी या स्पर्धेत सहभागी व्हावे, असे आवाहन नाट्य परिषदेचे अध्यक्ष अभिनेते प्रशांत दामले यांनी केले आहे.