81004

...अन्यथा गणेशोत्सवात वैभववाडीत रेल्वे रोखू

प्रवाशी संघटनेचा इशारा; रेल्वे स्थानकात विविध समस्या

सकाळ वृत्तसेवा
वैभववाडी, ता. ३० ः गेली २७ वर्षे कोकण रेल्वे प्रशासन वैभववाडीवर अन्याय करीत आहे. गेली दोन वर्षे आम्ही विविध मागण्यांसाठी सतत पाठपुरावा करीत आहोत. मात्र, त्याकडे रेल्वेप्रशासन दुर्लक्ष करीत आहे. त्यामुळे गणेशोत्सवापूर्वी आमच्या मागण्या मान्य झाल्या नाहीत, तर गणेश चतुर्थीतीच वैभववाडी रेल्वे स्थानकात रेल्वे रोको आंदोलन छेडू, असा इशारा वैभववाडी प्रवाशी संघटनेने दिला.
वैभववाडी रेल्वे स्थानकातील विविध समस्यांविषयी गेली दोन वर्षे वैभववाडी तालुका रेल्वे प्रवासी संघटना सातत्याने पाठपुरावा करीत आहे. यामध्ये कोरोनात बंद केलेले तिकीट आरक्षण सुरू करावे, दोन्ही प्लॅटफॉर्मवर छप्पर उभारावे, वैभववाडी स्थानकात पाच जलद गाड्यांना थांबा मिळावा, स्काय वॉकवर छप्पर उभारणी करावी, प्लॅटफॉर्मला पेव्हरब्लॉक बसवावे, रेल्वे स्थानकात आरपीएफ जवान नेमावेत, रेल्वे स्थानकाचे सुशोभीकरण करावे, रेल्वे स्थानक ते मुख्य रस्ता दुरुस्ती करावी, रिक्षा स्थानक, स्थानकातील पाणीपुरवठा सुरळीत करा, नापणे फाट्यापर्यंत स्ट्रीटलाईट कायम सुरू ठेवावेत, तुतारी नियोजित वेळेत धावेल यादृष्टीने उपाययोजना कराव्यात या मागण्यांचा समावेश होता.
यासंदर्भात चर्चा करण्यासाठी आज येथील रेल्वे स्थानकात कोकण रेल्वे वरिष्ठ वाणिज्य परीक्षक मधुकर मातोंडकर, वरिष्ठ खंड अभियंता (इलेक्‍ट्रिक) चिन्मय भंडारी, वरिष्ठ खंड अभियंता (वर्कर्स) जी. पी. प्रकाश, आर. जी. पावसकर हे आले होते. यावेळी वैभववाडी रेल्वे प्रवाशी संघटनेचे अध्यक्ष किशोर जैतापकर, व्यापारी मंडळाचे अध्यक्ष तेजस आंबेकर, संतोष राणे, सुरेश सावंत, रमेश नारकर, बाबा तावडे, प्रकाश बोडेकर, रघुनाथ कोकाटे, पंडित रावराणे, तेजस साळुंखे आदी उपस्थित होते.
प्रवासी संघटनेचे अध्यक्ष जैतापकर यांनी गेली दोन वर्षे आम्ही सातत्याने रेल्वे प्रशासनाकडे समस्या सोडविण्याबाबत पाठपुरावा करीत आहोत. परंतु, दोन वर्षांत एकही समस्या रेल्वे प्रशासनाकडून सोडविलेली नाही. इतर रेल्वे स्थानकाच्या तुलनेत या रेल्वे स्थानकावर वैभववाडी, कणकवली, देवगड, गगनबावडा, राजापूर या पाच तालुक्यांतील प्रवाशी येत असतात. मात्र, त्या तुलनेत येथे थांबणाऱ्या जलद गाड्यांची संख्या कमी आहे.
---
२७ वर्षांपासून अन्याय
सर्वच बाबतीत या स्थानकावर अन्याय होत आहे. गेली २७ वर्षे आमच्यावर अन्याय झाला आहे. त्यामुळे यापुढे अजिबात थांबणार नाही. गणेशोत्सवापूर्वी आमच्या महत्वपूर्ण मागण्या तातडीने पूर्ण करा; अन्यथा गणेशोत्सवातच कोणतीही कल्पना न देता रेल्वे रोको आंदोलन करू, असा इशारा देण्यात आला. आमच्यावर गुन्हे दाखल झाले, तरी आम्ही माघार घेणार नाही, असेदेखील संघटनेने स्पष्ट केले. रेल्वेच्या अधिकाऱ्यांनी चर्चेचा अहवाल प्रधान कार्यालयाकडे पाठविण्यात येणार असल्याचे स्पष्ट केले.