सुयश अकॅडमीमध्ये पालक, शिक्षक सभा
सकाळ वृत्तसेवा
रत्नागिरी, ता. ३१ : रत्नागिरी एज्युकेशन सोसायटीच्या सुयश अॅकॅडमीमध्ये विद्यार्थी, पालक आणि शिक्षकसभा झाली. या सभेला गोगटे- जोगळेकर महाविद्यालयाचे प्राचार्य डॉ. मकरंद साखळकर, परीक्षा नियंत्रक डॉ. विवेक भिडे, गणित विभागाचे माजी विभागप्रमुख डॉ. राजीव सप्रे उपस्थित होते.
डॉ. भिडे यांनी विद्यार्थी आणि पालकांशी मोकळा संवाद साधत स्वयंअध्ययनाचे महत्व, शिक्षक आणि पालकांची भूमिका, विद्यार्थ्यांचे कर्तव्य अशा महत्त्वपूर्ण विषयावर मार्गदर्शन केले. डॉ. सप्रे यांनी स्पर्धा परीक्षांची तयारी कशी करावी, विषयाचा गाभा कसा समजून घ्यावा याबद्दल आपल्या प्रदीर्घ अनुभवातून बहुमोल मार्गदर्शन केले. अध्यक्षीय मनोगत प्राचार्य डॉ. साखळकर यांनी सुयश अॅकॅडमीच्या स्थापनेमागची उद्दिष्टे, कार्यप्रणालीबद्दल सभेला संबोधित केले. सभेला पालकांचा उत्स्फूर्त प्रतिसाद लाभला. या वेळी पालक प्रतिनिधींची निवड करण्यात आली. विद्यार्थ्यांच्या प्रगतीचा आढावा घेण्यात आला. प्रत्येक विद्यार्थ्याचा अभ्यास आणि प्रगतीबाबत पालकांशी व्यक्तिगत चर्चा करण्यात आली. सभेचे संपूर्ण नियोजन अॅकॅडमीचे समन्वयक चेतन मालशे यांनी पाहिले. अॅकॅडमीच्या अनुष्का शितूत आणि संकेत सोहनी यांचे सहकार्य लाभले.