सावर्डे विद्यालयात वृक्षारोपण
सावर्डे : सावर्डे येथील गोविंदराव निकम माध्यमिक व उच्च माध्यमिक विद्यालयात एक पेड माँ के नाम या उपक्रमाने वृक्षारोपण करण्यात आले. उपक्रमांतर्गत विद्यार्थ्यांनी आईच्या प्रेमाला व सन्मानाला समर्पित करत एक झाड लावले तसेच त्याचे संगोपन करण्याचा संकल्प केला. सर्वच विद्यार्थ्यांनी या उपक्रमात उत्स्फूर्त सहभाग घेतला होता. कार्यक्रमाचे उद्‍घाटन मुख्याध्यापक राजेंद्र वारे यांच्या हस्ते करण्यात आले. विद्यार्थ्यांनी झाडांना आपल्या आईच्या नावाने ओळख देत त्यांच्यावर नावाच्या फलकांची नोंद केली. हा उपक्रम केवळ पर्यावरण संवर्धनासाठीच नव्हे तर मातृत्वाच्या महत्त्वाची जाणीव करून देणारा ठरला. अशा प्रकारच्या उपक्रमांमुळे विद्यार्थ्यांमध्ये निसर्गप्रेम व कृतज्ञता यांची रूजवणूक होते, असे मत पर्यावरणप्रेमी व उपक्रमाचे संयोजक साजिद चिकटे यांनी व्यक्त केले.

मालघरला कृषी महाविद्यालयात वृक्षारोपण
सावर्डे : चिपळूण तालुक्यातील मालघर येथील गोविंदरावजी निकम कृषी महाविद्यालयाच्या कृषितीर्थ परिवाराच्या वतीने सीआरए तंत्रज्ञानाच्या माध्यमातून वृक्षारोपण करण्यात आले. कृषिदुतांनी सीआरए तंत्रज्ञानाचे प्रात्यक्षिक उपस्थित शेतकऱ्यांना दाखवले. या वेळी आंबा, काजूसारख्या विविध उपयुक्त वृक्षांची लागवड केली. झाडे लावा, झाडे जगवा हा संदेश देत निसर्गाचे रक्षण करण्याचा संकल्प सर्वांनी केला. या उपक्रमासाठी मालघरचे कृषी सहायक सुधीर आमरे यांचे विशेष योगदान लाभले. गावातील विविध शेतकऱ्यांच्या शेतांवर जाऊन प्रत्यक्ष वृक्ष लागवड केली गेली. ही लागवड आधुनिक पद्धत सीआरए तंत्रज्ञानाद्वारे करण्यात आली. ही झाडे भविष्यात पर्यावरण रक्षणात मोलाची भूमिका बजावतील, असा विश्वास व्यक्त करण्यात आला.

जिल्हास्तरीय, विभागीय स्पर्धांसाठी
क्रीडा संघटनांचे सहकार्य ः शिंदे
रत्नागिरी ः जिल्हा क्रीडा परिषद आणि जिल्हा क्रीडाधिकारी कार्यालय यांच्या वतीने २०२५-२६ या शैक्षणिक वर्षातील विनाअनुदानित खेळांच्या जिल्हा व विभागस्तर क्रीडा स्पर्धांचे आयोजन केले आहे. त्यामध्ये जिल्हा व विभागस्तरावर विविध खेळांचा समावेश असेल. या स्पर्धांच्या आयोजनासाठी क्रीडा संघटनांना तांत्रिक आणि आर्थिक सहकार्य देण्यात येईल. या आयोजनासाठी आवश्यक साहित्य, निवास व्यवस्था, मुलामुलींसाठी चेंजिंग रूम आणि स्वच्छतागृहे उपलब्ध असणे आवश्यक आहे. त्यासाठी विविध क्रीडा संघटनांनी जिल्हा व विभागस्तरीय क्रीडा स्पर्धा आयोजनाकरिता नोंदणी प्रमाणपत्र, संलग्नता प्रमाणपत्र, तांत्रिक व आर्थिक सहकार्याचे पत्र आणि स्पर्धा आयोजनाचे मागणीपत्र इत्यादी आवश्यक कागदपत्रांसह जिल्हा क्रीडाधिकारी कार्यालयात सादर करावे, असे आवाहन जिल्हा क्रीडाधिकारी विजय शिंदे यांनी केले आहे.