81718

सिंधुदुर्गात शिवसेना अग्रेसर बनवू

वर्षा कुडाळकर ः मालवणात संघटनात्मक विषयांवर चर्चा

सकाळ वृत्तसेवा
मालवण, ता. २ : शिवसेना मुख्य नेते उपमुख्यमंत्री एकनाथ शिंदे, आमदार नीलेश राणे यांना अभिप्रेत असलेली शिवसेना सिंधुदुर्ग जिल्ह्यात अग्रेसर करण्यासाठी सर्व पदाधिकारी शिवसैनिक एकसंधपणे काम करत आहेत. सिंधुदुर्ग जिल्हा शिवसेना राज्यात अग्रेसर ठरेल, असा विश्वास शिवसेना माजी महिला जिल्हाप्रमुख वर्षा कुडाळकर यांनी व्यक्त केला.
वर्षा कुडाळकर यांसह उपजिल्हाप्रमुख अरविंद करलकर, उपजिल्हाप्रमुख विश्वास गावकर यांनी शिवसेना जिल्हाप्रमुख दत्ता सामंत यांच्या कुंभारमाठ निवासस्थानी भेट देऊन संघटनात्मक विविध विषयांवर चर्चा केली. श्री. सामंत यांच्यासोबत सर्व चर्चा सकारात्मक झाली, असे सांगत कुडाळकर यांनी पत्रकारांशी संवाद साधला.
त्या पुढे म्हणाल्या, ‘‘आमदार राणे नेहमीच सर्वांच्या संपर्कात असतात. पक्ष संघटनेत वरिष्ठ स्तरावरून आपला सन्मान होईल, असे मला त्यांनी त्यावेळीच सांगितले. त्यामुळे माझ्या मनात कुठलेच ‘किंतु परंतु’ नाही. शिवसेना संघटना मजबूत करणे हेच आमचे लक्ष्य आहे. पक्षात जुने पदाधिकारी, तसेच नव्याने पक्षा सोबत जोडलेले हे सर्व एकसंध काम करत आहेत. अनेक नियुक्त्या बाकी आहेत. यात ज्येष्ठांसह सर्वांना संधी दिली जाईल. सिंधुदुर्ग जिल्हा शिवसेना अग्रेसर हेच आमचे लक्ष्य आहे.’’
---
‘आम्ही सर्वजण एकसंध’
कुडाळकर म्हणाल्या, ‘‘मी यापूर्वी महिला जिल्हाप्रमुख म्हणून काम केले. नव्या कार्यकारिणीत दीपलक्ष्मी पडते यांना जिल्हाप्रमुख म्हणून संधी मिळाली; मात्र मला पदावरून काढले, अशा चर्चा पसरवून आमच्या संघटनेत वाद आहेत, असा संभ्रम निर्माण करण्याचा प्रयत्न काहींनी केला; पण आम्ही सर्वजण एकसंध आहोत.’’