82069

विद्यार्थी आत्मनिर्भर तर देश सक्षम
प्रज्ञा परबः वेतोरे हायस्कूलमध्ये ‘सक्षम तू’ उपक्रम
सकाळ वृत्तसेवा
वेंगुर्ले, ता. ४ः समाजातील नवीन पिढी हीच भारताची भावी आधारस्तंभ आहे. अत्याचाराशी सामना करताना विद्यार्थ्यांनी स्वतः सक्षम होणे गरजेचे आहे, तरच भारत सक्षम बनेल. आधुनिकतेकडे वाटचाल करीत असताना नवनविन निर्माण झालेल्या सुखसोयींचा योग्य तो वापर नव्या पिढीने करावा, असे आवाहन राष्ट्रवादीच्या महिला जिल्हाध्यक्ष प्रज्ञा परब यांनी विद्यार्थ्यांना केले.
उपमुख्यमंत्री अजित पवार यांच्या वाढदिवसानिमित्त प्रदेशाध्यक्ष सुनील तटकरे व महिला प्रदेश अध्यक्षा तथा महिला आयोगाच्या अध्यक्षा रुपाली चाकणकर यांच्या सूचनेनुसार राष्ट्रवादी काँग्रेसतर्फे सर्व जिल्ह्यांमध्ये ‘सक्षम तू’ हा कार्यक्रम राबविण्यात येत आहे. सिंधुदुर्ग जिल्ह्यातील या कार्यक्रमाची सुरुवात तालुक्यातील वेतोरे येथील श्री सातेरी हायस्कूलमधून करण्यात आली.
यावेळी राष्ट्रवादीच्या महिला जिल्हाध्यक्ष प्रज्ञा परब, जिल्हा सदस्य साधना शिरोडकर, ‘दामिनी’ पथकाच्या प्रमुख दीपिका मठकर, वेंगुर्ले पोलिस ठाण्याचे वाहतूक पोलिस मनोज परुळेकर, राष्ट्रवादी काँग्रेस वेंगुर्ले युवा अध्यक्ष गजानन कुंभार, महिला वेंगुर्ले तालुकाध्यक्ष ऋतुजा शेटकर, पोलिस श्री. सराफदार, मुख्याध्यापक संजय परब, शिक्षक श्री. खरवडे आदी उपस्थित होते.
वाहतूक पोलिस मनोज परुळेकर तसेच दामिनी पथकाच्या प्रमुख मठकर यांनी विद्यार्थ्यांना कायदेविषयक, पोक्सो, सायबर गुन्हेगारीबाबत माहिती दिली. मुख्याध्यापक परब यांनी आभार मानले. उभादांडा न्यू इंग्लिश स्कूलमध्ये शुक्रवारी (ता. ८) ‘सक्षम तू’ हा कार्यक्रम आयोजित केला आहे, अशी माहिती यावेळी देण्यात आली.