82274

कुणकेश्वर मंदिरात दर्शनासाठी रांगा
दुसरा श्रावण सोमवारः वाडा विमलेश्वर मंदिरातही वर्दळ
सकाळ वृत्तसेवा
देवगड, ता. ५ : तालुक्यातील श्री क्षेत्र कुणकेश्वर मंदिरात काल (ता. ४) दुसऱ्या श्रावण सोमवार निमित्ताने भाविकांनी दर्शनासाठी गर्दी केली होती. मंदिरात दर्शनासाठी रांग लागली होती. दिवसभरात विविध मान्यवरांनी दर्शन घेतले. वाडा येथील श्री देव विमलेश्‍वर मंदिरात तसेच शहरातील श्री ब्राह्मणदेव मंदिरातही भाविकांची दर्शनासाठी वर्दळ होती.
श्रावण महिन्यातील कालचा दुसरा सोमवार होता. श्री देव कुणकेश्वर मंदिर देवस्थान ट्रस्टने भाविकांच्या सोयीसाठी दर्शन मंडप तसेच दर्शन रांगांची व्यवस्था केली होती. पावसापासून सुरक्षिततेसाठी मंडप घालण्यात आला होता. भाविकांना थेट गाभार्‍यात जाऊन श्रींचे दर्शन घेता येत होते. दर्शनासाठी भाविकांची रांग लागली होती. मंदिरात विधीवत पूजा झाल्यावर मंदिर भाविकांना दर्शनासाठी खुले करण्यात आले. मंदिरात जिल्हा पोलिस अधीक्षक मोहन दहिकर यांनी पूजा केली. यावेळी देवस्थान ट्रस्टचे अध्यक्ष एकनाथ तेली, व्यवस्थापक रामदास तेजम आदी उपस्थित होते. मंदिरात भजने सुरू होती.
सकाळपासून पाऊस नसल्याने सोयीचे झाले होते; मात्र सायंकाळी पावसाच्या सरी बरसल्या. मंदिरात सायंकाळी उशिरापर्यंत भाविक दर्शनासाठी येत होते. दिवसभरात विविध ठिकाणच्या भाविकांनी दर्शन घेतले. कुणकेश्‍वर मार्गावर वाहनांची वर्दळ सुरू होती. मंदिर आणि परिसरात भाविकांची वर्दळ होती. तालुक्यासह जिल्हाभरातील भाविक दर्शनासाठी आल्याचे दिसत होते. एकूणच सर्वत्र उत्साही वातावरण होते. तसेच तालुक्यातील वाडा येथील श्री देव विमलेश्‍वर मंदिरात दर्शनासाठी भाविकांची वर्दळ होती. येथील शहरातील श्री ब्राह्मणदेव मंदिरातही भाविकांची दर्शनासाठी गर्दी झाली होती.
दरम्यान, सायंकाळपर्यंत पाऊस नसल्याने सर्वांच्या सोयीचे झाले होते. विविध मंदिरात आजही नवविवाहितांची शिवामूठ घालण्यासाठी धांदल होती.