82534

विद्यार्थ्यांच्या कर्तृत्वाचे खुले आकाश

मुणगेत पर्यावरणपुरक राख्यांची विक्री; शाळा क्रमांक १ मध्ये श्रमप्रतिष्ठेचे धडे

सकाळ वृत्तसेवा
मुणगे, ता. ६ ः येथील जिल्हा परिषद प्राथमिक शाळा मुणगे क्र. १ मधील विद्यार्थ्यांनी यंदाच्या रक्षाबंधन सणाचे औचित्य साधत एक वेगळा उपक्रम राबविला. विद्यार्थ्यांनी स्वतःच्या कल्पकतेने आणि हस्तकौशल्याने पर्यावरणपूरक राख्या तयार करून त्या स्थानिक बाजारात विक्रीसाठी ठेवल्या. या उपक्रमातून विद्यार्थ्यांनी सामाजिक भान, उद्योजकता आणि श्रमप्रतिष्ठा यांचे ज्ञान घेतले.
या उपक्रमात विद्यार्थ्यांनी कागद, कापूस, दोरा, फुलांच्या पाकळ्या, मोती आणि इतर पर्यावरणपूरक साहित्य वापरले. तयार झालेल्या राख्या आकर्षक असल्याने त्यांना स्थानिक बाजारपेठेत चांगली मागणी मिळाली. गावातील श्री देवी भगवती मंदिर प्रांगणात विद्यार्थ्यांनी राखीचा स्टॉल लावून त्यांची विक्री केली. गावातील नागरिकांनीही विद्यार्थ्यांच्या कलागुणांचे कौतुक करत उत्स्फूर्त प्रतिसाद दिला.
शाळेचे मुख्याध्यापक सुदेश धुळे यांनी सांगितले की, ‘विद्यार्थ्यांच्या अंगी असलेल्या कौशल्याला चालना देणे आणि शिक्षणासोबत व्यावहारिक अनुभव देणे, हेच या उपक्रमाचे मुख्य उद्दिष्ट होते. मुलांना व्यावहारिक ज्ञान मिळावे, खरेदी-विक्री, नफा-तोटा या संकल्पना समजाव्यात, हा मुख्य उद्देश होता. या उपक्रमातून हा हेतू सफल झाला.’ हा उपक्रम यशस्वी होण्यासाठी शिक्षक पांडुरंग नाडगौडा यांनी मुलांना विशेष मार्गदर्शन केले.
पालक व ग्रामस्थांनी विद्यार्थ्यांचे मनापासून अभिनंदन केले. अशा प्रकारच्या उपक्रमांमुळे शाळा आणि समाज यांच्यातील नाते अधिक दृढ होत असल्याचे त्यांनी सांगितले. हा उपक्रम विद्यार्थ्यांच्या सर्वांगीण विकासाचा एक उत्कृष्ट नमुना ठरला असून, त्यांच्या लहानशा प्रयत्नातून शिक्षण म्हणजे केवळ पुस्तकी ज्ञान नव्हे, तर समाजाशी जोडलेली जीवनकला आहे, असा संदेश मिळाला. या उपक्रमास शाळा व्यवस्थापन समिती, माता-पालक संघ यांचे विशेष सहकार्य लाभले.