83125

स.ह. केळकर महाविद्यालयात
विद्यार्थ्यांना व्यवसायाचे धडे

देवगड, ता. ९ ः येथील स. ह. केळकर महाविद्यालयातील वाणिज्य विभागातर्फे ‘कॉमर्स डे’च्या निमित्ताने खाद्यपदार्थ स्पर्धा घेण्यात आली. या उपक्रमात कनिष्ठ व वरिष्ठ महाविद्यालयातील विद्यार्थ्यांनी उत्स्फूर्त सहभाग नोंदवला. एकूण १४ गटांनी विविध खाद्यपदार्थ तयार करून विक्रीसाठी मांडणी केली होती.
या उपक्रमाचा उद्देश विद्यार्थ्यांना व्यावसायिक कौशल्य, विक्री तंत्रज्ञान आणि ग्राहक व्यवहार यांचा प्रत्यक्ष अनुभव देणे हा होता. विद्यार्थ्यांनी स्वहस्ते तयार केलेले खाद्यपदार्थ सादर केले. या उपक्रमाचे उद्‍घाटन प्रभारी प्राचार्य विजयकुमार कुनुरे यांच्या हस्ते करण्यात आले. यावेळी उपप्राचार्य श्रीकांत सिरसाठे, लक्ष्मण सुरवसे, कनिष्ठ महाविद्यालयाचे पर्यवेक्षक मिलिंद भिडे यांनी मार्गदर्शन केले. स्पर्धेचे परीक्षण मनाली गावकर व शामली तारी यांनी केले. विभागप्रमुख सुहास खरात व अच्युत कांबळी यांनी स्पर्धेच्या आयोजनासाठी विद्यार्थ्यांना मार्गदर्शन केले.