-rat१०p३६.jpg-
P२५N८३४६२
राजापूर ः श्रीदेव अंजनेश्‍वर मंदिर.
-----
श्रावण सोमवार विशेष------लोगो

मिठगवाणे येथील श्री देव अंजनेश्वर
देखणं कोरीवकाम ; गोमंतकीय शैलीचा प्रभाव असलेले मंदिर
सकाळ वृत्तसेवा
राजापूर, ता. १० ः तालुक्याच्या पश्‍चिम भागातील मिठगवाणे येथील श्रीदेव अंजनेश्वराचे पुरातन मंदिर असून जागृत स्वयंभू देवस्थान म्हणून त्याची ओळख आहे. मंदिरातील लाकडी कोरीवकाम देखणं असून त्यात कोरलेली विविध शिल्पे आणि मंदिराच्या प्रांगणातील जांभ्या दगडात कोरीव काम केलेली उंच दीपमाळा साऱ्यांचे लक्ष वेधून घेते. या मंदिराचे बांधकाम स्थापत्यशास्त्राचा उत्तम नमुना असून त्यावर गोमंतकीय शैलीचा प्रभाव असल्याचे मानले जाते.
अंजनेश्वराच्या मंदिरातील रचना सभामंडप, अंतराळ व गर्भगृह अशी आहे. सभागृहात सुंदर नक्षीकाम असलेल्या भक्कम लाकडी खांबांच्या आधारावर छप्पर आहे. अंतर्गृहात आकर्षक रंगसंगतीत रंगवलेले दोन अडीच फूट रुंदीचे भक्कम लाकडी खांब असून त्यावर देवदेवतांची आणि इतर चित्रे कोरलेली आहेत. लाकडी तुळ्यांवर आकर्षक नक्षीकाम दिसून येते. गाभाऱ्‍याच्या प्रवेशद्वाराबाहेर एक सुंदर नंदीशिल्प आहे. उजव्या बाजूला गणेशमूर्ती असून डाव्या हाताला ठेवलेल्या लाकडी देव्हाऱ्‍यात नंदीवर विराजमान शिव शंकर आणि देवी पार्वतीची मूर्ती आहे. उत्सवकाळात वापरात येणारा देवाचा पितळी मुखवटा आणि नागफणी आहे. गाभाऱ्‍यात भव्य शिवपिंडी असून त्यावर चांदीचा पंचमुखी नागफणा आहे. पिंडीवर असलेल्या पात्रातून सतत अभिषेक सुरू असतो. चारही बाजूने जांभ्या दगडाची भक्कम तटबंदी असलेला मंदिर परिसर विस्तीर्ण आहे. चिरेबंदी प्रवेशद्वारावर नगारखाना असून तेथे जाण्यासाठी दगडी पायऱ्‍या केलेल्या आहेत. महाद्वारातून मंदिर परिसरात प्रवेश केल्यावर समोरच मोठे तुळशीवृंदावन आणि दगडी दीपमाळा आहे.