वेदिका वजराटकर, मिताली खोत प्रथम
नेमळेतील श्लोक पठण स्पर्धा ः पंचक्रोशी विद्यालयाच्या उपक्रमास प्रतिसाद
सकाळ वृत्तसेवा
सावंतवाडी, ता. १० ः नेमळे पंचक्रोशी माध्यमिक व उच्च माध्यमिक विद्यालयात संस्कृत दिनाचे औचित्य साधून दोन गटांत संस्कृत श्लोक पठण स्पर्धा घेण्यात आली. स्पर्धेत लहान गटात वेदिका वजराटकर, मोठ्या गटातून मिताली खोत यांनी प्रथम क्रमांक पटकावला.
कार्यक्रमाच्या अध्यक्षा विद्यालयाच्या प्राचार्या कल्पना बोवलेकर यांच्या हस्ते सरस्वतीच्या प्रतिमेचे पूजन करण्यात आले. उपस्थित शिक्षकांच्या हस्ते दीपप्रज्वलन करण्यात आले. प्रा. बोवलेकर यांनी, संस्कृतसह विविध भाषांमुळे आपली संस्कृती टिकून आहे. सगळे संस्कार भाषेतून मिळतात. श्लोक पाठांतर केल्यामुळे स्मरणशक्ती वाढते. संगणकाची अनुकूल भाषा संस्कृत आहे, असे सांगितले.
विद्यालयातील शिक्षक अनिल कांबळे यांनी ‘प्रणोदेवी सरस्वती’ या सरस्वती प्रार्थनेने व ‘नैव क्लिष्टा न च कठिना’ हे संस्कृत गीत गाऊन कार्यक्रमाची सुरुवात केली. उत्तम संस्कार झालेली शुध्द अशी ही भाषा असून, तिचे ग्रंथभांडार समृध्द आणि विस्तीर्ण आहे. आध्यात्मिक ज्ञान हे संस्कृतमध्ये ठासून भरले आहे. या भाषेचा प्रचार करणे महत्त्वाचे आहे, असे विद्यालयाचे शिक्षक अनिल कांबळे यांनी संस्कृत दिनानिमित्त झालेल्या या कार्यक्रमात उद्‌गार काढले.
पाचवी ते आठवी गटात द्वितीय लतिका मेस्त्री, तृतीय आराध्य चव्हाण, मोठ्या गटातून द्वितीय भार्गवी आळवे, यज्ञेश शिंदे
यांनी यश मिळविले. स्पर्धेसाठी विद्यालयाच्या माजी शिक्षिका श्रद्धा नाईक यांनी ठेव ठेवली असून, त्याच्या व्याजातून स्पर्धेतील यश प्राप्त विद्यार्थ्यांना बक्षीस दिले जाते. स्पर्धेत एकूण २८ विद्यार्थ्यांनी सहभाग घेतला. परीक्षण उमेश राऊळ यांनी केले. अनिल कांबळे यांनी सूत्रसंचालन केले. आभार राजेश गुडेकर यांनी मानले. यावेळी विद्यालयातील शिक्षक एम. पी. सारंग, लवू जाधव, सी. टी. बंगाळ आदी उपस्थित होते.