नाते टिकवा, घराचे गोकूळ बनवा
अनंत शास्त्री मुळ्ये ः रांगव येथे भागवत सप्ताह
सकाळ वृत्तसेवा
संगमेश्वर, ता. ११ ः कुटुंब व नातेवाईक तसेच आपली माणसे यांच्याशी आपले नाते टिकून राहावे याकरिता प्रभूरामाने राजगादीचा त्याग करून १४ वर्षे वनवासात जाणे पसंत केले. रामावरील प्रेम, श्रद्धा, बंधुत्व निष्ठा ठेवून भरताने रामाच्या पादुका गादीवर ठेवून राजगादीचा कारभार चालू ठेवला व भरतनेही त्याग करून नंदिग्राम राहणे पसंत केले. यावरून जीवनात किती मोठे झालात तरीही कुटुंबात व नातेवाइकांशी असणारे नाते अद्ययावतपणे टिकवा व आपल्या घराचे गोकूळ बनवा, असे प्रतिपादन कीर्तनकार अनंत शास्त्री मुळे यांनी केले.
संगमेश्वर तालुक्यातील रांगव येथील नाना सरमोकादम यांच्या निवासी आयोजित भागवत सप्ताहाप्रसंगी ते बोलत होते. या कार्यक्रमाचे यजमान‌ नाना सरमोकादम कुटुंबीय यांनी दरम्यान भागवत सप्ताहाचे आयोजन केले आहे. या सप्ताहात आळंदी येथील सुप्रसिद्ध निष्णांत कीर्तनकार, प्रवचनकार अनंत शास्त्री मुळ्ये या सप्ताहात प्रवचन देत असून, या दिवशी वामन अवतार, एकादशी माहात्म्य, रामकथा, कृष्णकथा, कृष्णाष्टमी, या विषयावर आपल्या ओघवत्या शैलीमध्ये व सुरेल वाणी प्रवचनाने दर दिवशी उपस्थित रसिक प्रेक्षकांना मंत्रमुग्ध करत आहेत. त्यामुळे रसिकांसाठी पर्वणीच म्हणावी लागेल.
विशेष बाब म्हणजे शास्त्रीजींना साथ करणारे तबलावादक, हार्मोनिअम वादक रवींद्र गंगणे व अनिल उमरे हे दोघेही अंध आहेत. त्या दोघांनाही वादन व गायन कला उत्तम अवगत आहे.