83664

महायुतीतील भ्रष्ट मंत्र्यांची हकालपट्टी करा

ठाकरे शिवसेना ः सिंधुदुर्गनगरीत ‘जनआक्रोश’ आंदोलन

सकाळ वृत्तसेवा
सिंधुदुर्गनगरी, ता. ११ ः महायुती सरकारच्या कलंकित आणि भ्रष्टाचारी मंत्र्यांची हकालपट्टी करा, या मागणीसाठी ठाकरे शिवसेनेतर्फे आज जिल्हाधिकारी कार्यालयासमोर जनआक्रोश आंदोलन करण्यात आले. शासनाच्या विरोधात घोषणा देत परिसर दणाणून सोडला.
विद्यमान महायुती सरकारमधील काही मंत्री बेताल वक्तव्ये करीत आहेत. बार चालविणे, रमी खेळणे यासारखे निंदनीय प्रकार विधिमंडळात सुरू आहेत. त्यामुळे महाराष्ट्राचे नाव कलंकित झाले आहे. असे प्रकार राजरोस होत असतील, तर अशा मंत्र्यांना मंत्रिपदावर राहण्याचा अधिकार नाही. राज्यात मतांची चोरी होते, मतदान चुकीच्या पद्धतीने घेतले जाते, हे उघड झाले आहे. आता सत्तेत असलेले मंत्री विधिमंडळात रमी खेळणे तसेच मंत्री बार चालवित असतील, तर हे राज्यासाठी लाजिरवाणे आहे. त्यामुळे अशा भ्रटाचारी व बदनाम मंत्र्यांची हकालपट्टी करा, या मागणीसाठी संपूर्ण राज्यभर शिवसेना ठाकरे गटातर्फे जनआक्रोश आंदोलन करण्यात आले. त्याला पाठिंबा देत ठाकरे गटातर्फे आज येथील जिल्हाधिकारी कार्यालयासमोर आंदोलन केले. यावेळी आपल्या मागणीचे निवेदन मुख्यमंत्र्यांना देण्यासाठी अतिरिक्त जिल्हाधिकारी शुभांगी साठे यांच्याकडे सादर केले.
यावेळी माजी आमदार राजन तेली, जिल्हाप्रमुख संदेश पारकर, बाबूराव धुरी, महिला आघाडीच्या जिल्हाप्रमुख मधुरा पालव आदी उपस्थित होते. या आंदोलनाच्या पार्श्वभूमीवर मोठ्या प्रमाणात पोलिस बंदोबस्त तैनात होता. यावेळी शासन आणि भ्रष्ट मंत्र्यांच्या विरोधात जोरदार घोषणा देत त्यांच्या कृतीचा निषेध करण्यात आला.