जनसेवा ग्रंथालयाची
२३ ला वार्षिक सभा
रत्नागिरी ः शहरातील जनसेवा ग्रंथालयाची वार्षिक सर्वसाधारण सभा २३ ऑगस्टला होणार आहे. ही सभा लक्ष्मीचौक येथील जनसेवा ग्रंथालयात दुपारी चार वाजता होणार आहे. सभेत वार्षिक जमाखर्च, लेखापरीक्षण, अहवाल मंजुरी, हिशोब तपासणीसांची नियुक्ती, मागील इतिवृत्ताला मंजुरी, अंदाजपत्रकाला मंजुरी आदी कामे होणार आहेत. संस्थेच्या सर्व सभासदांनी उपस्थित राहून कामकाजात सहभाग घ्यावा, असे आवाहन जनसेवा ग्रंथालयाचे अध्यक्ष प्रकाश दळवी यांनी केले आहे.
---------
आविष्कार संशोधन
स्पर्धा कार्यशाळा
रत्नागिरी ः भारत शिक्षण मंडळाच्या देव, घैसास, कीर कला, वाणिज्य, विज्ञान वरिष्ठ महाविद्यालयातील विद्यार्थ्यांनी खेड येथील ज्ञानदीप विज्ञान आणि वाणिज्य कॉलेज येथे आयोजित मुंबई विद्यापीठाच्या २०व्या आविष्कार संशोधन स्पर्धेच्या कार्यशाळेत सहभाग घेतला. स्वराली इंदुलकर (द्वितीय वर्ष विज्ञान) व सोनिया शुक्ला (तृतीय वर्ष वाणिज्य) या विद्यार्थिनी आणि महाविद्यालयाच्या आविष्कार रिसर्च समितीच्या सदस्य प्रा. आसावरी मयेकर यात सहभागी झाल्या. कार्यशाळेमधून आविष्कार संशोधन स्पर्धेकरिता प्रकल्प कसा करावा, त्याची मांडणी व सादरीकरण याबद्दल मार्गदर्शन देण्यात आले. त्याचबरोबर विद्यार्थ्यांकडून वेगवेगळे उपक्रम करून घेण्यात आले. या कार्यशाळेमधून विद्यार्थ्यांना अत्यंत उपयुक्त माहिती मिळाली.
---------
माहेर संस्थेत
रक्षाबंधन उत्साहात
रत्नागिरी ः हातखंबा येथील माहेर संस्थेत बहीण-भावाच्या अतूट नात्यांचा रक्षाबंधन हा सण दरवर्षीप्रमाणे याही वर्षी मोठ्या उत्साहात साजरा झाला. दाखल महिलांनी संस्थेत दाखल असणाऱ्या निराधार पुरुषांना राखी बांधली. संस्थेतील मुलींनी स्वतःच्या हाताने बनवलेली राखी मुलांना बांधली. माहेर संस्थेतील मुलींनी आशादीप मतिमंद मुलांची संस्था, मिरजोळे, एमआयडीसी येथे रक्षाबंधन हा सण साजरा केला. निरीक्षणगृहातील मुलांना माहेर संस्थेतील मुलींनी राखी बांधली. माहेर संस्थेमध्ये समाजातल्या विविध स्तरातून रक्षाबंधन साजरी करण्यासाठी लोकांनी गर्दी केली. त्यामध्ये युवा संघर्ष ग्रुप, देवरूख, प्रजापिता ब्रह्माकुमारी विश्वविद्यालयातील कार्यकर्त्यांचा समावेश होता. मिलाग्रीस चर्चचे फादर व सिस्टर यांनी माहेर संस्थेतील वृद्ध पुरुषांना राखी बांधून हा सण साजरा केला. कार्यक्रमासाठी माहेर संस्थेचे प्रकल्पप्रमुख सामाजिक कार्यकर्ते सुनील कांबळे, अधीक्षिका शीतल हिवराळे, वृषभ खडसे, विजया कांबळे, छाया दळवी, फुलाताई पवार, अर्चना भिल्ल, राकेश भिल्ल, अमित येलवे, आशिष मुळे आदी उपस्थित होते.