आरोग्यसेवक पदी नियुक्ती द्या;
अन्यथा स्वातंत्र्यदिनी उपोषण

पात्र उमेदवारांचा इशारा; सीईओंना निवेदन

सकाळ वृत्तसेवा
सिंधुदुर्गनगरी, ता. ११ ः आरोग्य सेवक महिला सरळ सेवा पद भरतीतील पात्र उमेदवारांना तत्काळ नियुक्ती द्या, या मागणीसाठी सिंधुदुर्ग जिल्ह्यातील भरती पात्र उमेदवारांनी जिल्हा परिषदेसमोर १५ ऑगस्टला उपोषण करण्याचा निर्णय घेतला आहे. याबाबतचे निवेदन आज मुख्य कार्यकारी अधिकाऱ्यांना सादर केले.
निवेदनात म्हटले आहे की, आरोग्य सेवक महिला सरळ सेवा पदभरती २०२३-२४ चा निकाल लागून एक वर्ष पूर्ण झाले. मात्र, अद्याप पात्र उमेदवारांना नियुक्ती आदेश दिले नाहीत. या पदभरतीतील जिल्हा परिषद संवर्गातील औषध निर्माता अधिकारी या सर्व पदांच्या पदभरतीच्या प्रक्रिया पूर्ण होऊन त्यातील पात्र उमेदवारांना नियुक्ती आदेश दिले आहेत. तसेच अन्य जिल्ह्यांत या भरतीतील पात्र उमेदवारांना नियुक्ती दिली आहे. मात्र, सिंधुदुर्ग जिल्ह्यातील आरोग्य सेवक महिला संवर्गातील उमेदवार या भरतीसाठी पात्र होऊनही जिल्हा परिषदेकडून अद्याप नियुक्ती आदेश नाहीत. यामुळे जिल्ह्यातील आरोग्य सेवक महिला पदभरतीतील उमेदवारांमध्ये तीव्र नाराजी आहे. नियुक्ती आदेश मिळावा, यासाठी गेले वर्षभर जिल्हा परिषद प्रशासनाशी पत्रव्यवहार तसेच लक्ष वेधूनही अद्याप नियुक्ती दिलेली नाही. ही प्रक्रिया विरुद्ध राष्ट्रीय आरोग्य अभियानातील कर्मचारी न्यायालयात गेल्याने ही नियुक्ती देण्यास विलंब होत असल्याचे जिल्हा परिषद प्रशासनाकडून वारंवार सांगण्यात येत आहे. मात्र, राष्ट्रीय आरोग्य अभियानांतर्गत कार्यरत असताना कर्मचारी न्यायालयात जाऊ शकत नाहीत, असे असूनही भरती विरोधात न्यायालयात जाणाऱ्या कर्मचाऱ्यांवर अद्याप कोणतीही कारवाई न करता त्यांना पुढील नियुक्ती दिली आहे, तर २०२३-२४ च्या पदभरतीचा निकाल लागून एक वर्ष उलटले, तरी अद्याप पात्र उमेदवारांना नियुक्ती देण्यास आरोग्य प्रशासनाकडून टाळाटाळ होत आहे. प्रशासनाने १४ ऑगस्टपर्यंत पात्र उमेदवारांना नियुक्ती द्यावी; अन्यथा १५ ऑगस्टला जिल्हा परिषदेसमोर उपोषण छेडणार असल्याचा इशारा पदभरतीतील पात्र उमेदवारांनी जिल्हा परिषद प्रशासनाला निवेदनाद्वारे दिला आहे.