चौके येथे आज
आरोग्य शिबिर
मसुरे ः चौके ग्रामपंचायतीतर्फे उद्या (ता. १३) सकाळी १० ते दुपारी १ वाजेपर्यंत आरोग्य तपासणी शिबिराचे आयोजन केले आहे. समाजमंदिर, चौके येथे हे शिबिर होईल. शिबिराचा लाभ ग्रामस्थांनी घ्यावा, असे आवाहन सरपंच पी. के. चौकेकर यांनी केले आहे. या शिबिरामध्ये नागरिकांची तपासणी व औषधपुरवठा, किशोरवयीन मुली व महिलांची तपासणी, नेत्रतपासणी, मोफत मोतिबिंदू शस्त्रक्रिया, रक्त तपासणी अशा तपासणी करण्यात येणार आहेत. तपासणीसाठी येताना आधारकार्ड व सुरू असलेल्या गोळ्या, औषधे व जुने रिपोर्ट सुद्धा घेऊन यावेत, असे आवाहन सरपंच चौकेकर यांनी केले आहे.
......................
रेवतळेत १५ पासून
ओव्हरआर्म क्रिकेट
मालवण ः जन्माष्टमीचे औचित्य साधून महापुरुष रेवतळे मित्रमंडळ आयोजित ‘एक गाव एक संघ’ अंतर्गत ओव्हरआर्म क्रिकेट स्पर्धा १५ ते १७ ऑगस्ट कालावधीत महापुरुष रेवतळे मैदान येथे होणार आहे. स्पर्धेतील विजेत्या संघास २२ हजार व चषक, उपविजेत्या संघाला ११ हजार व चषक तसेच मालिकावीर, उत्कृष्ट फलंदाज, गोलंदाज, उत्कृष्ट क्षेत्ररक्षक बक्षिसे देऊन गौरविण्यात येणार आहे. अंतिम सामन्यात प्रवेश करणाऱ्या दोन्ही संघांना दहीडंडी फोडण्याची संधी देण्यात येणार आहे. अधिक माहितीसाठी पायस आल्मेडा यांच्याशी संपर्क साधावा.
...................
कलंबिस्तला शुक्रवारी
विद्यार्थी गुणगौरव
सावंतवाडी ः कलंबिस्त येथे विजय कदम मित्रमंडळातर्फे दरवर्षी क्रीडा व शैक्षणिक उपक्रम राबविले जातात. यावर्षी हायस्कूलमधील गुणवंत विद्यार्थ्यांचा, विशेषकरून दहावी परीक्षेत प्रथम तीन क्रमांकाने उत्तीर्ण झालेल्या विद्यार्थ्यांचा गौरव समारंभ शुक्रवारी (ता. १५) सकाळी ८.३० वाजता रणस्तंभ येथे होणार आहे. या सोहळ्याला उपस्थित राहण्याचे आवाहन मित्रमंडळातर्फे संस्थापक विजय कदम व अध्यक्ष राजेश पास्ते यांनी केले आहे.
--
सावंतवाडीत २४ ला
काव्य वाचन स्पर्धा
ओटवणे ः चिंतामणी साहित्य सहयोग सहकारी प्रकाशन संस्थेच्या आरती मराठी मासिक, सावंतवाडी येथील श्रीराम वाचन मंदिर यांच्या संयुक्त विद्यमाने २४ ऑगस्टला सकाळी १०.३० वाजता श्रीराम वाचन मंदिर येथे (कै.) कविवर्य विद्याधर भागवत स्मृती स्वरचित काव्य स्पर्धेचे आयोजन करण्यात आले आहे. ही स्पर्धा गोवा व सिंधुदुर्ग मर्यादित आहे. कविता स्वरचित असावी. दीर्घ नसावी. तसेच स्पर्धेत कविता स्वतः सादर करणे आवश्यक आहे.