बीएसएनएल सेवा
नेतर्डेत अखेर सुरू
बांदा, ता. १२ ः वर्षभराच्या मागणीनंतर अखेर नेतर्डे गावामध्ये बीएसएनएलची मोबाईल सेवा सुरू झाली आहे. या सेवेमुळे येथील ग्रामस्थांना मोठा दिलासा मिळाला आहे. पालकमंत्री नीतेश राणे यांच्या आदेशाने त्वरित सेवा सुरू झाल्याबद्दल माजी सभापती प्रमोद कामत यांनी त्यांचे विशेष आभार मानले. नेतर्डेत वर्षभरापूर्वी बीएसएनएल ​टॉवर उभारला. मात्र, नेटवर्कची समस्या कायम होती. पालकमंत्री राणे यांचे लक्ष वेधण्यात आले. गावामध्ये मोबाईल नेटवर्क नसल्यामुळे ग्रामस्थांना अनेक अडचणींना सामोरे जावे लागत होते. प्रशासकीय कामे, विद्यार्थ्यांचे ऑनलाईन शिक्षण आणि इतर दळणवळणाच्या कामांमध्ये यामुळे मोठा अडथळा येत होता.​ या मागणीची दखल घेत पालकमंत्री राणे यांनी बीएसएनएलच्या वरिष्ठ अधिकाऱ्यांशी संपर्क साधून नेतर्डे गावातील टॉवरची रेंज प्रक्रिया वेगवान करण्याचे निर्देश दिले. त्यांच्या प्रयत्नांमुळेच हे काम लवकर पूर्ण झाले, असे कामत यांनी सांगितले. बीएसएनएल सेवा सुरू झाल्यामुळे गावातील दळणवळण सुलभ झाले आहे. यामुळे स्थानिक ग्रामस्थांनी पालकमंत्री राणे यांचे आभार व्यक्त केले.